پاکستان نیوز پوائنٹ
جاپان امریکی ریاست نیویارک میں سیمی کنڈکٹر چپس بنانے کے دو کارخانوں پر 21 ارب ڈالر تک سرمایہ کاری کرے گا۔ کمپنی گلوبل فاؤنڈریز کے مطابق ان کارخانوں کی مشترکہ ملکیت امریکی حکومت اور جاپانی فریقین کے پاس ہوگی، جبکہ آپریشنز گلوبل فاؤنڈریز چلائے گی۔یہ سرمایہ کاری امریکی صدر ڈونلڈ ٹرمپ کی انتظامیہ اور جاپان کے درمیان گزشتہ سال طے پانے والے 550 ارب ڈالر کے سرمایہ کاری معاہدے کا حصہ ہے۔ اس معاہدے کے تحت امریکا نے جاپانی گاڑیوں اور دیگر درآمدی اشیا پر محصولات کم کرکے کم از کم 25 فیصد سے 15 فیصد کرنے پر اتفاق کیا تھا۔گلوبل فاؤنڈریز کے مطابق نئے کارخانوں میں امریکی حکومت بھی حصہ دار ہوگی، تاہم سرمایہ کاری کی پوری رقم جاپان فراہم کرے گا۔ کمپنی کارخانوں کی تعمیر اور آپریشن کے عوض فیس وصول کرے گی، جبکہ چپ سازی کی ٹیکنالوجی کے لائسنس بھی فراہم کرے گی۔گلوبل فاؤنڈریز کے چیف ایگزیکٹو ٹم برین نے خبر رساں ادارے رائٹرز کو بتایا کہ ایک الگ معاہدے کے تحت امریکی حکومت کمپنی میں 4 فیصد حصص حاصل کرے گی، جس کے بعد کمپنی میں اس کی مجموعی ملکیت تقریباً 7 فیصد ہوجائے گی۔ٹم برین کے مطابق جاپانی کمپنی رینساس الیکٹرونکس اور آئی فون بنانے والی کمپنی ایپل نیویارک کے نئے کارخانوں کے ابتدائی صارفین میں شامل ہوں گی۔ انہوں نے کہا کہ کمپنی امریکی اور جاپانی صارفین کو ترجیح دینا چاہتی ہے، تاہم دیگر ممالک کی کمپنیوں کو بھی خدمات فراہم کیے جانے کا امکان ہے۔معاہدے کے تحت امریکی صدر ڈونلڈ ٹرمپ جاپانی سرمایہ کاری سے مکمل کیے جانے والے منصوبوں کا انتخاب کریں گے۔ سرمایہ کاری سے حاصل ہونے والی دستیاب نقد آمدن دونوں ممالک میں برابر تقسیم ہوگی، یہاں تک کہ مخصوص حد پوری ہوجائے۔ اس کے بعد آمدن کا 90 فیصد امریکا کو ملے گا۔گلوبل فاؤنڈریز کے سربراہ کے مطابق جاپانی سرمایہ کاری کا کچھ حصہ چپ سازی کے آلات بنانے والی جاپانی کمپنیوں، بشمول ٹوکیو الیکٹرون، تک بھی پہنچ سکتا ہے۔ انہوں نے کہا کہ کمپنی جاپانی ٹیکنالوجی اور صنعتی شعبے کے ساتھ تعاون میں گہری دلچسپی رکھتی ہے۔
