نگران وزیراعظم انوار الحق کاکڑ کا کہنا ہے کہ عمران خان کے وفاداروں کو بھی الیکشن مہم چلانے اور ووٹ مانگنے کی اجازت ہوگی

پاکستان نیوز پوائنٹ
نگران وزیراعظم انوار الحق کاکڑ کا کہنا ہے کہ عمران خان کے وفاداروں کو بھی الیکشن مہم چلانے اور ووٹ مانگنے کی اجازت ہوگی، اگر اب بھی کوئی کہے کہ اسے لیول پلیئنگ فیلڈ نہیں ملی تو یہ کہنے کی بھی اسے اجازت ہے ۔ لاہور میں میڈیا سے بات کرتے ہوئے انوار الحق کاکڑ کا کہنا تھاکہ ابھی تک ایسی کوئی چیز سامنے نہیں آئی کہ الیکشن کمیشن پاکستان تحریک انصاف پر پابندی لگائے، تحریک انصاف کو الیکشن لڑنے کی مکمل اجازت ہوگی۔ نگران وزیراعظم انوار الحق کاکڑ نے کہا کہ رجسٹرڈ افغان مہاجرین کو واپس نہیں بھیج رہے تاہم غیر قانونی طور پر رہنے والے اپنے ملک جائیں ویزا لیں پھر پاکستان آسکتے ہیں، ہم نے غیرقانونی طور پر مقیم لوگوں کو پہلے وقت دیا، ان کے کاروبار یا دیگر طریقوں سے ان کو پریشان نہیں کیا، ہم نے ان پر مکمل طور پر پابندی نہیں لگائی، یہ اپنے ملک جائیں ویزا لیں پھر آسکتے ہیں