آرمی چیف کی ایرانی وزیر خارجہ سے ملاقات جیو اسٹریٹجک صورتحال اور درپیش چیلنجز پر تبادلہ خیال

پاکستان نیوز پوائنٹ
آرمی چیف جنرل عاصم منیر سے ایرانی وزیر خارجہ عباس عراقچی نے اہم ملاقات کی، جس میں دونوں ممالک کے درمیان جیواسٹریٹجک صورتحال اور درپیش چیلنجز پر تفصیل سے تبادلہ خیال کیا گیا۔پاک فوج کے شعبہ تعلقات عامہ (آئی ایس پی آر) کے مطابق ملاقات میں پاک ایران بارڈر سیکیورٹی میکانزم کے حوالے سے باہمی تعاون بڑھانے پر بھی غور کیا گیا۔آرمی چیف جنرل عاصم منیر نے اس موقع پر کہا کہ پاکستان اور ایران کے درمیان برادرانہ تعلقات ہیں اور دونوں ممالک کے مابین گہرے تاریخی، ثقافتی اور مذہبی تعلقات ہیں۔انہوں نے دونوں ممالک کے تعلقات کی اہمیت پر زور دیتے ہوئے کہا کہ دونوں جانب سے باہمی تعاون کو مزید فروغ دینے کے عزم کا اعادہ کیا گیا ہے.ملاقات میں دونوں ممالک نے علاقائی معاملات میں مثبت پیشرفت کے لیے مشترکہ طور پر کام جاری رکھنے پر اتفاق کیا۔ آئی ایس پی آر کے مطابق ایرانی وزیر خارجہ عباس عراقچی نے خطے میں امن و استحکام کے لیے پاکستان کی کوششوں کو سراہا اور ان کی اہمیت کو تسلیم کیا۔