بجلی کی قیمت میں 63 پیسے فی یونٹ سستی ہونے کامکان

پاکستان نیوز پوائنٹ
عوام کیلئے اچھی خبر ، بجلی کی قیمت میں 63 پیسے فی یونٹ سستی ہونے کامکان ، سینٹرل پرچیزنگ پاور ایجنسی (سی سی پی اے) نے نیپرا سے قیمت میں کمی کی درخواست کردی ، نیپرا بجلی کی قیمتوں میں کمی سے متعلق کل سماعت کرے گا،میڈیا رپورٹس کے مطابق بتایاگیا ہے کہ سی سی پی اے کی جانب سے قیمتوں میں کمی ماہانہ فیول پرائس ایڈجسٹمنٹ کے تحت ماہ نومبر کیلئے مانگی گئی۔ درخواست میں کہاگیا ہے کہ گزشتہ ماہ بجلی کی اوسط پیداواری لاگت 7 روپے 28 پیسے فی یونٹ رہی۔درخواست کے مطابق گزشتہ ماہ 7 ارب 71 کروڑ یونٹ بجلی پیدا ہوئی۔ بجلی کی پیداواری لاگت 55 ارب 76 کروڑ روپے رہی۔نیپرا اگر من وعن درخواست منظور کرتا ہے تو بجلی صارفین کو چار ارب 88 کروڑ روپے کا ریلیف ملے گا اور اکتوبر کی ماہانہ ایڈجسٹمنٹ کا ریلیف شہریوں کو دسمبر کے بلوں میں دیا جائے گا۔ تاہم اس کا اطلاق کے الیکٹرک صارفین پر نہیں ہوگا۔یاد رہے کہ اس سے قبل بھی وفاقی وزیر توانائی اویس لغاری کا کہنا تھا کہ ہم چاہتے تھے اگلے چار سال میں توانائی کا شعبہ بحران سے نکل آئے۔ پہلے صنعتوں کوساڑھے 58 روپے کا ملنے والا بجلی کا یونٹ اب 47 روپے 17 پیسے میں فراہم کیا جارہا تھا۔ ہم نے اپنی انڈسٹری سے سالانہ 150 ارب کی کراس سبسڈی کا بوجھ کم کیا تھا۔ اسلام آباد میں پریس کانفرنس کرتے ہوئے ان کا کہنا تھا کہ بجلی کی تقسیم کاری کے نظام کی نجکاری کی جارہی تھی۔ 2025 میں بجلی کی خرید و فروخت حکومت کی ذمہ داری نہیں رہے گی۔ عوام اور بجلی کمپنیاں اپنی مرضی سے سستی بجلی کی خرید و فروخت کرکے ایک دوسرے کو فائدہ پہنچا سکیں گے۔گفتگو کے دوران انہوں نے کہا تھا کہ پاکستان کو خطے میں سستی ترین بجلی فراہم کرکے دکھائیں گے۔ ڈسٹری بیوشن کمپنیوں کی پرائیویٹائزیشن کے بعد نیپرا کا کام مزید اہم ہو جائے گا۔ ڈسٹریبیوشن کمپنیوں کے لاسز کم اور ریکوری بہتر ہوئی تھی۔ کمپنیوں میں کوئی سفارشی بورڈ نہیں۔ بجلی کمپنیوں کے نقصانات کم ہوئے تھے۔ بجلی کمپنیوں کے نقصانات کو زیرو پر لائیں گے اور کیپیسٹی پیمنٹ کم کر کے بجلی سستی کریں گے۔