شام کے صوبے حمص میں واقع ایک علوی اکثریتی علاقے کی مسجد میں ہونے والے دھماکے کے نتیجے میں 5 افراد جاں بحق اور 21 زخمی ہو گئے

پاکستان نیوز پوائنٹ
شام کے صوبے حمص میں واقع ایک علوی اکثریتی علاقے کی مسجد میں ہونے والے دھماکے کے نتیجے میں 5 افراد جاں بحق اور 21 زخمی ہو گئے۔مقامی حکام کے مطابق دھماکا جمعہ کی نماز کے دوران پیش آیا .جس کے بعد علاقے میں خوف و ہراس پھیل گیا۔شامی سرکاری میڈیا کے مطابق سکیورٹی فورسز نے واقعے کے فوراً بعد مسجد اور اطراف کے علاقے کو گھیرے میں لے کر تحقیقات کا آغاز کر دیا ہے۔ حکام کا کہنا ہے کہ دھماکے کی نوعیت اور اس کے پس منظر سے متعلق مختلف پہلوؤں پر غور کیا جا رہا ہے۔مقامی حکام نے خبر رساں ادارے کو بتایا کہ ابتدائی اطلاعات کے مطابق دھماکا خودکش حملہ آور کی کارروائی یا مسجد میں پہلے سے نصب کیے گئے دھماکہ خیز مواد کا نتیجہ ہو سکتا ہے. تاہم حتمی تصدیق تحقیقات مکمل ہونے کے بعد کی جائے گی۔تاحال کسی گروہ نے دھماکے کی ذمہ داری قبول نہیں کی، جبکہ زخمیوں کو قریبی اسپتال منتقل کر دیا گیا ہے. جہاں بعض کی حالت تشویشناک بتائی جا رہی ہے۔