مولانا فضل الرحمان کا ایمرجنسی کو معدنی وسائل پر قبضے سے جوڑنا افسوسناک ہے دہشت گردی جیسے قومی مسئلے کو سیاسی الزامات کی نذر نہ کیا جائے طارق فضل چوہدری

پاکستان نیوز پوائنٹ
وفاقی وزیر طارق فضل چوہدری نے کہا ہے کہ مولانا فضل الرحمان کی جانب سے خیبرپختونخوا میں ایمرجنسی کے نفاذ کو معدنی وسائل پر قبضے سے جوڑنا افسوسناک ہےسماجی رابطے کی سائٹ ’ایکس‘ پر اپنے ایک بیان میں انہوں نے کہاکہ دہشتگردی جیسے سنگین قومی مسئلے کو سیاسی الزامات کی نذر کرنے کے بجائے اس کے خاتمے کے لیے سنجیدہ کردار ادا کرنے کی ضرورت ہے۔وفاقی حکومت کی اولین ترجیح خیبرپختونخوا کے عوام کا تحفظ اور صوبے میں امن و امان کا قیام ہے۔مولانا فضل الرحمان ایک سینیئر سیاستدان ہیں اور دہشتگردی سے ہونے والے نقصانات سے خود بھی بخوبی آگاہ ہیں۔ توقع ہے کہ وہ دہشتگردی کے خلاف قومی کوششوں کی حمایت کریں گے۔دوسری جانب پاکستان تحریک انصاف کو بھی اپنی کارکردگی اور صوبے میں امن و امان کی بگڑتی ہوئی صورتحال کا جواب دینا ہوگا، کیونکہ تحریک انصاف گزشتہ 13 سال سے خیبرپختونخوا میں برسرِ اقتدار ہے۔طارق فضل چوہدری کا کہنا تھا کہ پاکستان کی مسلح افواج کے افسران اور جوان وطن میں امن کے قیام کے لیے اپنی جانوں کی قربانیاں دے رہے ہیں۔ ایسے وقت میں ایک دوسرے پر سیاسی الزامات عائد کرنے کے بجائے قومی اتحاد اور دہشتگردی کے خلاف مشترکہ حکمت عملی اختیار کرنے کی ضرورت ہے۔خیبرپختونخوا کے عوام سیاسی محاذ آرائی نہیں بلکہ امن، تحفظ اور ترقی چاہتے ہیں۔