کراچی سال 2025 میں ٹریفک حادثات نے 800سے زائد افراد کی جان لے لی

پاکستان نیوز پوائنٹ
کراچی میں سال 2025کے دوران ہیوی ٹریفک سمیت سڑک پر ہونے والے مختلف حادثات میں 800 سے زائد افراد جاں بحق ہوگئے ہیں جبکہ ٹریفک حادثات کا یہ سلسلہ تاحال جاری ہے۔ تفصیلات کے مطابق ریسکیو حکام نے رواں سال ٹریفک حادثات سے معتلق اعدادوشمار جاری کردئیے۔ سال 2025 میں ٹریفک حادثات کا شکار ہو کر جاں بحق ہونے والے افراد کی تعداد 847 جبکہ زخمیوں کی 11 ہزار 990 رہی. جسے بے حد تشویشناک قرار دیا جارہا ہے۔ریسکیو حکام کے مطابق سال 2025 میں ہیوی ٹریفک نے 256افراد کو کچل کران کی جان لے لی جبکہ ڈمپر کی ٹکر سے 44، ٹریلرز سے 99 جبکہ واٹر ٹینکرز کی ٹکر سے کم از کم 60افراد جاں بحق ہوگئے۔ منی ٹرک کے حادثات میں 20 جبکہ بس حادثات میں 33افراد جان کی بازی ہار گئے۔حکام کا کہنا ہے کہ رواں سال مختلف قسم کے ٹریفک حادثات میں جاں بحق افراد کی مجموعی تعداد 847 میں سے 663مرد، 87 خواتین جبکہ 97 بچے بھی شامل ہیں۔ ٹریفک قوانین کی خلاف ورزی اور تیزرفتاری کے علاوہ منشیات کا استعمال بھی حادثات میں اضافے کا سبب بنتا ہے۔