کسی بھی جارحیت کا بھرپور جواب دیا جائےگا پاکستان کا بھارت کو دوٹوک پیغام

پاکستان نیوز پوائنٹ
ترجمان دفترخارجہ سجاد حیدر خان نےکہا ہے کہ امن کےعزم کو پاکستان کی کمزوری نہ سمجھا جائے کسی بھی جارحیت کا بھرپور جواب دیا جائے گا۔اسلام آباد میں ہفتہ وار میڈیا بریفنگ کے دوران سجاد حیدر خان نے بھارت کے جارحیت کی دھمکیوں پر مبنی اشتعال انگیز بیانات کو مسترد کرتے ہوئے کہا کہ بھارت کےغیرذمہ دارانہ بیانات اس کی بالادستی کی ذہنیت کی عکاسی کرتے ہیں۔ترجمان دفترخارجہ نے کہا کہ بھارت کاجارحانہ طرز عمل جنوبی ایشیا میں امن و استحکام کیلئے خطرات پیدا کررہا ہے، گزشتہ سال مئی میں پاکستان نے خودمختاری اور علاقائی سالمیت کےدفاع کی صلاحیت اور عزم کا مظاہرہ کیا۔سجاد حیدر خان نے کہا کہ پاکستان کسی بھی غیر دانشمندانہ جارحیت کا مقابلہ کرنےکیلئے پوری طرح تیار ہے، پاکستان کے امن کےعزم کو کمزوری نہ سمجھا جائے، کسی بھی جارحیت کا بھرپور جواب دیا جائے گا، بھارت گزشتہ سال کے تجربے سے سبق سیکھے،جارحانہ طرز عمل اور خطرناک بیان بازی ترک کرے، خطے میں پائیدار امن کیلئے ذمہ دارانہ طرز عمل اختیار کرنا ضروری ہے۔ سجاد حیدر خان نے مزیدکہاکہ پاکستان سعودی عرب پر حوثیوں کےحملوں کی مذمت کرتاہے، پاکستان سعودی عرب کےساتھ یکجہتی کا اظہار کرتاہے،پاکستان سعودی عرب کی خودمختاری،علاقائی سالمیت کےتحفظ کیلئے پرعزم ہے۔