آپریشن غضب للحق کی مؤثر کارروائیوں کے باعث افغان طالبان اور دہشتگرد مایوسی کا شکارہیں عطا تارڑ

پاکستان نیوز پوائنٹ
وفاقی وزیر اطلاعات و نشریات عطا تارڑ نے کہا ہے کہ افغان طالبان نے باجوڑ میں معصوم شہریوں پر حملہ کیا ہے۔ آج دوپہر 3 بج کر 30 منٹ پر افغان طالبان نے سرحد پار سے ضلع باجوڑ کے علاقے کو نشانہ بنایا ہےایک بیان میں عطا تارڑ نے کہا کہ افغان طالبان نے توپ خانے اور مارٹر فائرنگ کے ذریعے شہری آبادی کو نشانہ بنایا، ایک گھر مارٹر گولے کی زد میں آیا۔انہوں نے کہاکہ ضلع باجوڑ کے علاقے سالار زئی، تبستہ لیٹئی میں شہری آبادی کو دانستہ نشانہ بنایا گیا، حملے میں 4 معصوم شہری شہید اور 5 سالہ بچہ شدید زخمی ہوا ہے، شہید ہونے والے چاروں افراد ساجد، ایاز، ریاض اور معاذ بھائی تھے، مقامی لوگوں نے افغان طالبان رجیم کے دہشت گردانہ اقدام کی شدید مذمت کی اور غم و غصے کا اظہار کیا۔عطا تارڑ نے کہا کہ افغان طالبان رجیم معصوم شہریوں کو جان بوجھ کر نشانہ بنا رہے ہیں، افغان طالبان فتنہ الخوارج جیسی دہشت گرد تنظیموں کے ساتھ مل کر کارروائیاں کر رہے ہیں۔ انہوں نے کہا کہ ایسے حملے بین الاقوامی قوانین اور بنیادی انسانی اقدار کی سنگین خلاف ورزی ہیں، آپریشن غضب للحق کی مؤثر کارروائیوں کے باعث افغان طالبان اور دہشت گرد شدید دباؤ اور مایوسی کا شکارہیں۔انہوں نے مزید کہا کہ اس بزدلانہ اور گھناؤنے حملے کے ذمے دار افغان طالبان کی چوکیوں، انفرا اسٹرکچر کو مناسب اور بھرپور جواب دیا جا رہا ہے۔