امریکا کی حالیہ دھمکیوں کے بعد ایران کی مسلح افواج کی جانب سے سخت ردعمل سامنے آیا ہے

پاکستان نیوز پوائنٹ
امریکا کی حالیہ دھمکیوں کے بعد ایران کی مسلح افواج کی جانب سے سخت ردعمل سامنے آیا ہے۔ ایرانی مسلح افواج کے ترجمان ابراہیم ذوالفقاری نے خبردار کیا ہے کہ ایران نے کبھی دشمن کے سامنے سر نہیں جھکایا اور اگر کسی نے حملے کی کوشش کی تو اس کے سنگین نتائج ہوں گے۔ ان کا کہنا تھا کہ ایرانی قوم اور افواج اپنے ملک کا بھرپور دفاع کریں گی اور حملہ آوروں کو سخت جواب دیا جائے گا۔دوسری جانب پاسداران انقلاب نے امریکی بیانات کو مسترد کرتے ہوئے واضح کیا کہ دشمنوں کے لیے آبنائے ہرمز نہیں کھولی جائے گی۔ ادھر ایرانی پارلیمانی نیشنل سکیورٹی کمیشن کے سربراہ ابراہیم عزیزی نے بھی سخت لہجہ اپناتے ہوئے کہا کہ خطے میں کسی بھی تبدیلی کی صورت میں امریکا کے عزائم ناکام ہوں گے اور آبنائے ہرمز کھلنے کا فیصلہ ایران اپنی شرائط پر کرے گا۔یہ صورتحال ایسے وقت میں سامنے آئی ہے جب امریکی صدر ڈونلڈ ٹرمپ نے جنگ بندی کو آبنائے ہرمز کھولنے سے مشروط کرتے ہوئے ایران کو مزید سخت کارروائی کی دھمکی دی ہے، جس سے خطے میں کشیدگی مزید بڑھ گئی ہے۔