پاکستان نیوز پوائنٹ
امریکی وزیر خزانہ اسکاٹ بیسنٹ نے کہا ہے کہ ایران کے خلاف جاری امریکی بحری ناکہ بندی ایرانی معیشت کو مزید کمزور کردے گی،انہوں نے مزید کہا امریکا نے گزشتہ 14 روز کے دوران خلیج سے 13 کروڑ بیرل تیل کی ترسیل میں مدد فراہم کی ہے۔اسکاٹ بیسنٹ کے مطابق ایرانی بندرگاہوں کی ناکہ بندی سے ملک کی بحری تجارت براہِ راست متاثر ہورہی ہے۔ انہوں نے کہا کہ ایران کی تیل برآمدات کے اہم مرکز خارک جزیرے میں تیل ذخیرہ کرنے کی گنجائش جلد مکمل ہوجائے گی، جس کے نتیجے میں ایران کے تیل کے کنویں بھی بند کرنے پڑسکتے ہیں۔امریکی وزیر خزانہ نے کہا کہ بحری ناکہ بندی کے نتیجے میں ایران کی اپنی تیل برآمدات میں نمایاں کمی آئے گی، تاہم امریکی بحری نگرانی اور حفاظتی اقدامات کے تحت عالمی تیل کی ترسیل جاری رکھی گئی ہے۔ان کے مطابق امریکی بحری دستوں نے آبنائے ہرمز کے ذریعے عالمی منڈی کے لیے 13 کروڑ بیرل تیل کی محفوظ ترسیل میں مدد فراہم کی، تاکہ عالمی توانائی کی منڈیوں کو مستحکم رکھا جاسکے۔امریکی محکمہ خزانہ نے ایران پر اقتصادی دباؤ مزید بڑھاتے ہوئے ثانوی پابندیوں کا دائرہ بھی وسیع کردیا ہے۔ نئی پابندیوں کے تحت ان غیر ملکی کمپنیوں اور ممالک کو بھی نشانہ بنانے کی دھمکی دی گئی ہے جو تہران کے ساتھ کاروباری روابط برقرار رکھیں گے۔امریکی اقدامات میں ڈیجیٹل اثاثوں، سونے، ہوا بازی اور شپنگ سمیت مختلف شعبوں سے وابستہ ادارے بھی شامل ہیں.جس کا مقصد ایران کے لیے آمدنی کے اہم ذرائع کو محدود کرنا اور اس کی معیشت پر مزید دباؤ ڈالنا ہے
