جوہری تنصیبات کو نشانہ نہ بنایا جائے پاکستان کی اماراتی نیوکلیئر پلانٹ پر حملے کی مذمت

پاکستان نیوز پوائنٹ
دفتر خارجہ نے متحدہ عرب امارات کے براکہ نیوکلیئر انرجی پلانٹ پر ڈرون حملے کی شدید مذمت کرتے ہوئے کہا کہ پاکستان یو اے ای کی حکومت اور عوام سے مکمل یکجہتی کا اظہار کرتا ہے۔ترجمان دفتر خارجہ کے مطابق ایٹمی تنصیبات کو نشانہ بنانا بین الاقوامی قانون، انسانی قانون اور اقوام متحدہ چارٹر کی سنگین خلاف ورزی ہے. ایسے حملے آئی اے ای اے کے اصولوں اور نیوکلیئر سیفٹی و سیکیورٹی کے بنیادی ضوابط کے منافی ہیں۔بیان میں مزید کہا گیا کہ ایٹمی تنصیبات کو کسی بھی صورت نشانہ نہیں بنایا جانا چاہیے ایسے اقدامات تباہ کن اور ناقابل واپسی نتائج کا باعث بن سکتے ہیں۔دفتر خارجہ کا کہنا تھا کہ انسانی جانوں، ماحول اور علاقائی و عالمی امن و سلامتی کے لیے سنگین خطرات لاحق ہو سکتے ہیں، شہری نیوکلیئر انفرااسٹرکچر کا تحفظ ایک تسلیم شدہ عالمی اصول ہے جسے ہر صورت برقرار رکھا جانا چاہیے۔پاکستان نے تمام فریقین سے زیادہ سے زیادہ تحمل کا مظاہرہ کرنے اور بین الاقوامی قوانین کی پاسداری کی اپیل کی اور کہا کہ کشیدگی میں اضافے سے گریز کیا جائے. ایسے اقدامات کے اثرات خطے سے باہر تک جا سکتے ہیں۔ترجمان دفتر خارجہ نے مزید کہا کہ اقوام متحدہ چارٹر کے مطابق مذاکرات اور سفارتکاری ہی امن، استحکام اور ڈی اسکیلیشن کا واحد راستہ ہیں۔