پاکستان نیوز پوائنٹ
پنجاب حکومت نے صوبے میں طویل المدتی عوامی مسائل کے حل کے لیے گلوبل اسٹینڈرڈ ڈویلپمنٹ پروگرام متعارف کروا دیا جس کے تحت صفائی، پانی کی فراہمی، سیوریج، سٹریٹ لائٹس اور مثالی گاؤں پراجیکٹس پر کام کیا جائے گا۔ذرائع کے مطابق وزیراعلیٰ مریم نواز شریف کی زیر صدارت خصوصی ویڈیولنک اجلاس میں تمام پراجیکٹس کی پیشرفت کا جائزہ لیا گیا۔وزیراعلیٰ پنجاب نے کہا کہ 70، 80 سال میں جو کام نہیں ہوئے، وہ آج کیے جا رہے ہیں اور پانچ سال کے بعد لاہور اور پنجاب کے دیگر شہروں کو جدید اور خوبصورت انداز میں دیکھنا ممکن ہوگا۔مون سون سے قبل نکاسی آب کے پراجیکٹس مکمل کرنے کی ہدایت دی گئی ہے جبکہ شہروں میں انڈر گراؤنڈ واٹر ٹینک، ریچارج ویلز اور ٹف ٹائلز بچھائی جائیں گی تاکہ زیر زمین پانی کی سطح میں بہتری آئے۔بارشی پانی کے ذخیرے کے لیے 34 بڑے انڈرگراؤنڈ سٹوریج ٹینک بنائے جائیں گے، مختلف علاقوں میں 6,100 کلومیٹر سٹریٹ اور سیوریج لائنیں بچھائی جائیں گی، جبکہ 61 ڈسپوزل اسٹیشنز کی بحالی اور 56 نئے اسٹیشنز بھی تعمیر کیے جائیں گے۔تفصیلات کے مطابق صوبے میں 328 ویسٹ واٹر ٹریٹمنٹ پلانٹس لگائے جائیں گے جو پانی کو کھیتوں میں آبپاشی کے لیے فراہم کریں گے۔ مختلف شہروں میں 14,679 مقامات پر سٹریٹ لائٹس نصب کی جائیں گی اور گلیوں و راستوں پر 33 ملین مربع فٹ ٹف ٹائلز بچھائی جائیں گی جبکہ شہری نکاسی آب اور دیگر کاموں کے لیے 526 جدید مشینیں فراہم کی جائیں گی۔ مثالی گاؤں پراجیکٹ کے تحت 485 دیہات میں 59 ارب روپے کی سکیمیں شروع کی جائیں گی جبکہ 200 دیہات میں یہ منصوبہ عمل میں آئے گا۔ گندے پانی کے تالاب اور جوہڑ صاف کیے جائیں گے اور ویسٹ واٹر ٹریٹمنٹ پلانٹس کے ذریعے پانی کی بحالی ہوگی۔ دیہات میں پختہ گلیاں اور ڈرینج سسٹمز بھی بنائے جائیں گے۔ فلٹریشن پلانٹس کی فعالیت کو یقینی بنانے کی ہدایت دی گئی ہے اور پوٹھوہار میں سمال ڈیمز کے ذریعے صاف پانی کی فراہمی کے منصوبے پر رپورٹ پیش کی گئی ہے۔مختلف شہروں میں صاف پانی کی بوتلیں فراہم کرنے کے منصوبے پر بھی پیشرفت جاری ہے۔ وزیراعلیٰ مریم نواز نے کہا کہ اس تاریخی ڈویلپمنٹ پلان سے پنجاب بھر میں 78 سالہ پسماندگی کا خاتمہ ممکن ہوگا اور اب نہ صرف شہروں میں پانی ضائع ہوگا بلکہ گلیوں میں اندھیرا بھی نہیں رہے گا۔ یہ منصوبے پانچ سال کے دوران پنجاب کے شہری اور دیہی علاقوں میں ترقی اور جدید سہولیات کی نئی مثال قائم کریں گے۔
