پاکستان نیوز پوائنٹ
یمن میں سعودی قیادت میں اتحادی فورسز نے حوثی اہلکاروں اور ان کی فوجی صلاحیتوں کو نشانہ بنانے کے لیے بڑے پیمانے پر فوجی آپریشن شروع کرنے کا اعلان کیا ہے، اتحادی فورسز کے ترجمان کے مطابق حوثیوں کے زیرِ کنٹرول علاقوں میں اب تک 136 فوجی اہداف تباہ کیے جا چکے ہیں۔ سماجی رابطے کی ویب سائٹ ایکس پر جاری متعدد پوسٹس میں اتحادی فورسز کے ترجمان نے بتایا کہ کارروائیوں کا بنیادی مقصد حوثیوں کی فوجی صلاحیتوں کو کمزور کرنا، بالخصوص ان کے بیلسٹک میزائل نیٹ ورک کو ختم کرنا ہے۔ سعودی اتحادی فورسز کے مطابق حوثیوں کے میزائل نیٹ ورک کو تباہ کرنے کے لیے کارروائیاں جاری ہیں، جبکہ یمنی مسلح افواج کے دستوں کو چوبیس گھنٹے فضائی معاونت بھی فراہم کی جا رہی ہے۔ اتحادی فورسز کے ترجمان کا کہنا ہے کہ یمن میں حوثیوں کے ٹھکانوں کو متعدد فضائی حملوں میں نشانہ بنایا گیا ہے اور یہ کارروائیاں ایک وسیع فوجی آپریشن کا حصہ ہیں۔ دوسری جانب حوثی میڈیا کے مطابق سعودی قیادت میں اتحادی فورسز کے فضائی حملوں میں یمن کے شمال مغربی صوبے صعدہ کے مختلف علاقوں کو نشانہ بنایا گیا ہے۔
