پاکستان نیوز پوائنٹ
عالمی مارکیٹ میں سونے کی قیمت جمعہ کو کمی کا شکار رہی اور قیمتی دھات رواں ہفتے خسارے کی جانب گامزن ہوگئی، سرمایہ کاروں کی جانب سے حالیہ تیزی کے بعد منافع سمیٹنے کے باعث سونے کی قیمت میں دباؤ دیکھا گیا۔ خبر رساں ادارے کے مطابق کو 03:36 جی ایم ٹی تک اسپاٹ گولڈ کی قیمت 0.5 فیصد کمی کے بعد 4,326.75 ڈالر فی اونس رہی، جبکہ دسمبر کے لیے امریکی گولڈ فیوچرز تقریباً ایک فیصد کمی کے ساتھ 4,382.50 ڈالر فی اونس پر آگئے۔ سونا جمعرات کو 5 جون کے بعد بلند ترین سطح پر پہنچا تھا، تاہم بعد ازاں قیمت میں 1.3 فیصد کمی ریکارڈ کی گئی، جس کے بعد قیمتی دھات رواں ہفتے مجموعی طور پر خسارے کی جانب بڑھ رہی ہے۔مارکیٹ ماہرین کے مطابق حالیہ تیزی کے بعد کچھ سرمایہ کار منافع حاصل کر رہے ہیں، جبکہ فوری طور پر سونے کی قیمت کو مزید اوپر لے جانے والا کوئی بڑا محرک بھی موجود نہیں۔ دوسری جانب امریکی مہنگائی کے نسبتاً نرم اعداد و شمار نے بھی مارکیٹ کی سمت پر اثر ڈالا ہے۔ جولائی میں امریکی پروڈیوسر قیمتوں میں کوئی اضافہ نہیں ہوا، جبکہ صارفین کی قیمتوں میں بھی معمولی اضافہ ریکارڈ کیا گیا۔ ان اعداد و شمار کے بعد امریکی فیڈرل ریزرو کی ستمبر میں شرح سود بڑھانے کی توقعات کم ہوگئی ہیں۔ سی ایم ای فیڈ واچ ٹول کے مطابق اب ستمبر میں شرح سود میں اضافے کا امکان تقریباً 35 فیصد رہ گیا ہے، جو گزشتہ ہفتے تقریباً 55 فیصد تھا۔ ماہرین کے مطابق کم شرح سود سونے کے لیے نسبتاً سازگار ہوتی ہے کیونکہ اس سے منافع دینے والے اثاثوں کے مقابلے میں سونے کی کشش بڑھ جاتی ہے۔ دریں اثنا، امریکا کی جانب سے ایران کے خلاف بحری ناکہ بندی کو غیر معینہ مدت تک جاری رکھنے کی دھمکی نے عالمی جغرافیائی سیاسی صورتحال میں بھی غیر یقینی برقرار رکھی ہے، جو سونے کی قیمتوں پر اثرانداز ہوسکتی ہے۔ دیگر قیمتی دھاتوں میں چاندی کی اسپاٹ قیمت 0.4 فیصد کمی کے ساتھ 64.17 ڈالر فی اونس رہی، جبکہ پلاٹینم 0.3 فیصد کمی کے بعد 1,711.84 ڈالر فی اونس پر آگیا۔ پیلیڈیم 1,306.98 ڈالر فی اونس پر تقریباً مستحکم رہا۔ ایک مارکیٹ ماہر کے مطابق اگر سونے کی قیمت 4,400 ڈالر کی سطح عبور کرنے میں کامیاب ہوجاتی ہے تو رواں سال کے اختتام تک 5,000 ڈالر فی اونس کی سطح بھی ممکن ہوسکتی ہے، تاہم اس کے لیے مارکیٹ میں مزید تیزی کے محرکات درکار ہوں گی ۔
