مکہ مکرمہ پر ڈرون حملے کی کوشش قابل مذمت سعودی عرب کیساتھ کھڑے ہیں وزیراعظم

پاکستان نیوز پوائنٹ
پاکستان نے مکہ مکرمہ پر حوثیوں کے ڈرون حملے کی کوشش کی مذمت کرتے ہوئے سعودی عرب کی خودمختاری، علاقائی سالمیت اور سلامتی کی مکمل حمایت کا اعلان کیا ہے۔نجی ٹی وی چینل ہم نیوز کے مطابق وزیراعظم شہباز شریف نےکہا ہے کہ پاکستان سعودی عرب کی خودمختاری اور علاقائی سالمیت کے دفاع کے ساتھ حرمین شریفین کے تحفظ اور تقدس کے لیے غیر متزلزل طور پر سعودی عرب کے شانہ بشانہ کھڑا ہے، یہ ایک ایسی ذمہ داری ہے جسے ہر پاکستانی اپنے دل کے قریب رکھتا ہے۔وزیراعظم نے اپنے بیان میں کہا کہ پاکستان کے عوام اس اشتعال انگیز اور افسوسناک اقدام پر غمزدہ اور سخت تشویش میں مبتلا ہیں،اس قابلِ مذمت اور ناقابلِ معافی اقدام پر ہمارے دلوں میں موجود گہرے دکھ اور کرب کو بیان کرنے کے لیے الفاظ ناکافی ہیں۔ان کا مزید کہنا تھا کہ سعودی افواج نے فوری اور بہادری سے کارروائی کرتے ہوئے خطرے کا بھرپور مقابلہ کیا، سعودی مسلح افواج کی غیر معمولی بہادری اور پیشہ ورانہ صلاحیتوں کو سلام پیش کرتے ہیں۔وزیراعظم نے مزید کہا کہ فریقین زیادہ سے زیادہ تحمل کا مظاہرہ کریں اور مزید کشیدگی سے پیچھے ہٹیں، ہمارا خطہ پہلے ہی تنازعات کی بہت بھاری قیمت ادا کر چکا ہے، مکالمہ اور سفارت کاری ہی خطے میں پائیدار امن کی جانب واحد قابلِ عمل راستہ ہے۔