وزیراعلیٰ پنجاب مریم نواز نے کہا ہے کہ وطن عزیز کی ترقی میں بیرون ملک مقیم پاکستانیوں کا کردار بے حد اہم اور ناقابل فراموش ہے

پاکستان نیوز پوائنٹ
وزیراعلیٰ پنجاب مریم نواز نے کہا ہے کہ وطن عزیز کی ترقی میں بیرون ملک مقیم پاکستانیوں کا کردار بے حد اہم اور ناقابل فراموش ہے۔ انہوں نے کہا کہ حکومت اوورسیز پاکستانیوں کے مسائل کے حل کیلئے سنجیدہ اقدامات کر رہی ہے تاکہ ان کی خدمات کا بھرپور اعتراف کیا جا سکے یہ بات انہوں نے رکن قومی اسمبلی نصیر احمد عباس سے ملاقات کے دوران کہی، جس میں باہمی دلچسپی کے امور اور مختلف ترقیاتی منصوبوں پر پیشرفت کا جائزہ لیا گیا۔ ملاقات میں ن لیگ جاپان کے صدر ملک نور اعوان بھی شریک ہوئے۔ ملاقات کے دوران اوورسیز پاکستانیوں کو درپیش مسائل پر بھی تفصیلی گفتگو کی گئی وزیراعلیٰ مریم نواز نے کہا کہ مسلم لیگ ن ہمیشہ عوامی خدمت کی سیاست پر یقین رکھتی ہے اور یہی وجہ ہے کہ ہر علاقے کی ترقی اور عوامی فلاح کیلئے تمام دستیاب وسائل بروئے کار لائے جا رہے ہیں۔ انہوں نے کہا کہ دیہی علاقوں میں سہولیات کی فراہمی کیلئے مثالی گاؤں پراجیکٹ پر تیزی سے کام جاری ہے جس کے تحت دیہات میں معیاری انفرا اسٹرکچر اور بنیادی سہولیات فراہم کی جا رہی ہیں وزیراعلیٰ نے مزید بتایا کہ اب تک پنجاب کی 12 ہزار کلومیٹر طویل سڑکوں کی تعمیر و بحالی مکمل ہو چکی ہے جبکہ فیلڈ ہسپتال اور کلینک آن وہیلز کے ذریعے اب تک ایک کروڑ سے زائد مریضوں کو علاج کی سہولت فراہم کی جا چکی ہے