پاکستان نیوز پوائنٹ
امریکی صدر ڈونلڈ ٹرمپ نے تیل کمپنیوں کے عہدے داروں سے گفتگو کے دوران ایک موقع پر کہا کہ چین اور روس ہم سے وینزویلا کا تیل خرید سکتے ہیں۔ صدر ٹرمپ نے وائٹ ہاؤس میں تیل کمپنیوں کے عہدیداروں سے گفتگو میں کہا امریکی تیل کمپنیوں کو وینزیلا میں سیکیورٹی گارنٹی ملے گی، امریکا فوری طور پر وینزویلا کے تیل کو ریفائن اور فروخت کرنا شروع کرے گا۔ انھوں نے کہا تیل کے تاجروں کو وینزویلا میں مکمل سیکیورٹی فراہم کریں گے، تیل کے اس کاروبار سے امریکی شہریوں کو فائدہ ہوگا، ہم نے ایک آئل ٹینکر پکڑا جو ہماری مرضی کے بغیر وینزویلا سے چلا تھا، پکڑے گئے ٹینکر کا تیل وینزویلا کے ساتھ معاہدے کے تحت فروخت کیا جائے گا۔ ٹرمپ نے کہا ہماری فوج نے وینزویلا میں جو کچھ کیا وہ بہت اچھا تھا، یہ تاریخ کا بہترین آپریشن تھا، وینزویلا میں تیل کے بڑے ذخائر ہیں، دیکھیں گے آئل کمپنیاں وینزویلا کا انفرااسٹرکچر کیسے بنائیں گی۔ ان کا کہنا تھا کہ وینزویلا میں 100 ارب ڈالر تک سرمایہ کاری پر غور کیا جا رہا ہے، کل ہمیں وینزویلا کی طرف سے 30 ملین بیرل تیل دیا گیا تھا، وہاں تیل کی کون سی کمپنیاں جائیں گی اس کا فیصلہ کریں گے، تیل کمپنیاں امریکا سے براہ راست ڈیل کریں گی، وینزویلا سے نہیں۔ ٹرمپ نے کہا کہ وہ اگلے ہفتے تیل کمپنیوں کے ساتھ ایک اور ملاقات کریں گے۔
