آن لائن ادائیگی پر اضافی فیس وصول کرنے پر پابندی عائد

پاکستان نیوز پوائنٹ
کویت میں آن لائن ادائیگی پر اضافی فیس وصول کرنے پر پابندی عائد کردی گئی ہے۔کویت میں متعدد الیکٹرانک ادائیگی سروس فراہم کرنے والی کمپنیوں نے اپنے ساتھ منسلک تجارتی اداروں کو آگاہ کیا ہے کہ مرکزی بینک کی ہدایات کے مطابق صارفین سے الیکٹرانک ادائیگی کے طریقوں کے استعمال پر کسی بھی قسم کی اضافی فیس وصول کرنے پر پابندی عائد کر دی گئی ہے۔میڈیا رپورٹس کے مطابق ادائیگی کمپنیوں کی جانب سے سرکاری نوٹس جاری کردیا گیا ہے جس میں بتایا گیا ہے کہ یہ اقدام مرکزی بینک کویت کی جانب سے 30 ستمبر 2025 کو جاری کردہ سرکلر کے مطابق ہے۔سرکلر میں کویت کے اندر تمام تاجروں کو اس بات سے منع کردیا گیا ہے کہ وہ الیکٹرانک ادائیگی سروسز کے ذریعے ڈیبٹ یا کریڈٹ کارڈ کے استعمال پر صارفین سے کوئی اضافی رقم یا فیس وصول کریں۔یہ پابندی پوائنٹ آف سیل (POS) مشینیں، پیمنٹ گیٹ ویز، الیکٹرانک والٹس اور دیگر ڈیجیٹل ادائیگی کے طریقے پر لاگو ہوگی۔سرکلر میں خبردار کیا گیا ہے کہ خلاف ورزی کی صورت میں قانونی کارروائی کا سامنا کرنا پڑ سکتا ہے۔ ادائیگی سروس فراہم کرنے والوں، لائسنس یافتہ تجارتی اداروں اور صارفین کے درمیان معاہدوں کو نئی ہدایات کے مطابق اپ ڈیٹ کر دیا گیا ہے۔