روس امن کے لیے تیار نہیں یورپ کو فوجی صلاحیتوں میں تیزی سے اضافہ کرنا ہوگا یورپی یونین

پاکستان نیوز پوائنٹ
یورپی یونین کی خارجہ پالیسی چیف کایا کالاس نے خبردار کیا ہے کہ یورپ کو 2030 کے دفاعی اہداف کو پورا کرنے کے لیے خود کو تیزی اور زیادہ مؤثر انداز میں مسلح کرنے کی ضرورت ہے۔ انہوں نے کہا کہ یہ ثابت ہو چکا ہے کہ روس امن قائم کرنے میں قطعی طور پر کوئی دلچسپی نہیں رکھتا لہٰذا یورپ کو اپنے دفاعی نکتہ نظر میں فیصلہ کن تبدیلی لانی ہوگی۔برسلز میں یورپی وزرائے دفاع کے اجلاس کے بعد صحافیوں کو بریفنگ دیتے ہوئے کایا کالاس کا کہنا تھا کہ یورپی ممالک نے روس کی جانب سے درپیش خطرات کے پیشِ نظر ایک نئے ’ایمرجنسی سیکیورٹی پروٹوکول‘ پر بات چیت کا آغاز کر دیا ہے۔ان کے مطابق مجوزہ پروٹوکول کا مقصد ان واقعات پر فوری ردعمل دینا ہے جو نیٹو کے ’آرٹیکل 5‘ کے تحت مسلح حملے کے زمرے میں نہ آتے ہوں. لیکن وہ یورپی سلامتی کے لیے خطرہ ہوں۔انہوں نے کہا کہ اس صورتِ حال میں یہ دیکھا جائے گا کہ اس حملے کے خلاف فوری طور پر کون سے ذرائع اور اقدامات استعمال کیے جا سکتے ہیں۔اقوام متحدہ کے اجلاس کے موقع پر جرمنی اور روس کے وزرائے خارجہ کے درمیان ہونے والی بات چیت کا حوالہ دیتے ہوئے کہا کہ ’اس ملاقات کے بعد روس کا رویہ ثابت کرتا ہے کہ ماسکو امن نہیں چاہتا۔ انہوں نے کہا کہ یورپ سے باہر کئی ممالک یہ سمجھتے ہیں کہ روس کے ساتھ صرف بات چیت کرنے سے تمام مسائل حل ہو جائیں گے. تاہم روس کا رویہ اس کے برعکس دکھائی دیتا ہے۔کاجا کالاس کا کہنا تھا کہ ’اگر روس واقعی امن چاہتا ہے تو اسے شہریوں پر حملے بند کر کے یوکرین سے براہِ راست مذاکرات کرنا ہوں گے۔کاجا کالاس کا مزید کہنا تھا کہ یورپی یونین یوکرین کے مقبوضہ علاقوں میں انسانی امداد پہنچانے کی کوشش کر رہی ہے اور یوکرین کو اپنے دفاع میں مدد فراہم کرنے کا سلسلہ بھی جاری رکھے گی۔ انہوں نے انکشاف کیا کہ یورپی یونین روس کے خلاف اب تک کی سب سے بڑی پابندیوں کی فہرست پر بھی کام کر رہا ہے