صوبے میں کسانوں کو ایک کروڑ روپے تک بلاسود قرضے فراہم کیے جائیں گے وزیراعلیٰ پنجاب

پاکستان نیوز پوائنٹ
وزیراعلیٰ پنجاب مریم نواز نے کسانوں کے لیے ’پنجاب کسان بینک‘ قائم کرنے کا اعلان کرتے ہوئے کہا ہے کہ صوبائی حکومت کا مقصد کاشتکاروں کو مالی سہولتیں فراہم کرنا، زراعت کو جدید بنانا اور ان کی آمدن میں اضافہ کرنا ہے۔کسانوں سے خطاب کرتے ہوئے مریم نواز نے کہا کہ صوبے میں کسانوں کو ایک کروڑ روپے تک بلاسود قرضے فراہم کیے جائیں گے جبکہ انہیں زمین دینے اور مویشی پالنے کے شعبے کو فروغ دینے کے منصوبے بھی بنائے جا رہے ہیں۔انہوں نے کہا کہ حکومت کسانوں کے مسائل حل کرنے اور انہیں زرعی مداخل، مشینری اور مالی معاونت تک آسان رسائی فراہم کرنے کے لیے اقدامات کر رہی ہے۔وزیراعلیٰ پنجاب نے کہا کہ حکومت کسانوں کو زمین فراہم کرنے کے ساتھ مویشی پالنے کے شعبے کو بھی فروغ دے گی .تاکہ دیہی آبادی کے لیے مزید معاشی مواقع پیدا کیے جا سکیں اور زرعی معیشت کو مضبوط بنایا جا سکے۔ان کا کہنا تھا کہ زمین کی تقسیم کے منصوبے اور قرضوں کے حصول کے لیے اہلیت کے معیار کی تفصیلات جلد جاری کی جائیں گی۔مریم نواز نے کہا کہ زراعت پنجاب کی معیشت میں مرکزی حیثیت رکھتی ہے اور صوبہ ملک کی غذائی ضروریات پوری کرنے میں اہم کردار ادا کرتا ہے۔انہوں نے کہا کہ ’کسانوں کی فلاح و بہبود‘ معاشی ترقی کو برقرار رکھنے کے لیے ضروری ہے۔مریم نواز کا کہنا تھا کہ ’آپ کی سہولت، آپ کی آسانیاں اور آپ کا منافع میرے لیے بہت، بہت اہم ہیں۔‘وزیراعلیٰ پنجاب نے بتایا کہ صوبے میں تقریباً 10 لاکھ چھوٹے کسانوں کو کسان کارڈ فراہم کیے جا چکے ہیں۔ان کے مطابق کسان کارڈ کے ذریعے کاشتکاروں کو بیج، کھاد اور زرعی ادویات خریدنے میں آسانی ہوئی ہےجبکہ انہیں درمیانی افراد پر انحصار بھی کم کرنا پڑا ہے۔مریم نواز نے کسان کارڈ پروگرام کو کامیاب منصوبہ قرار دیتے ہوئے کہا کہ اس سے کسانوں کو براہ راست مالی سہولت ملی اور زرعی ضروریات کی خریداری تک ان کی رسائی بہتر ہوئی۔مریم نواز نے کہا کہ حکومت نے زرعی مشینری کے کرائے کی زیادہ لاگت کے مسئلے سے نمٹنے کے لیے زرعی مشینری کی فراہمی کا پروگرام بھی شروع کیا ہے۔انہوں نے بتایا کہ کسانوں میں تقریباً 25 ہزار ٹریکٹر تقسیم کیے جا چکے ہیں جبکہ آئندہ 2 سال کے دوران اس منصوبے کو مزید وسعت دینے کا ارادہ ہے۔ٹریکٹرز کی تقسیم سے زرعی مشینری تیار کرنے والی فیکٹریوں کو بھی فائدہ پہنچا ہے جن میں سے بعض بند ہونے کے قریب تھیں۔وزیراعلیٰ پنجاب نے کہا کہ حکومت نے یوریا اور ڈی اے پی سمیت کھادوں کی بلیک مارکیٹنگ روکنے اور انہیں مقررہ سرکاری نرخوں پر دستیاب بنانے کے لیے اقدامات کیے ہیں۔انہوں نے وزیر زراعت و لائیو اسٹاک عاشق حسین کرمانی کی کاوشوں کو سراہتے ہوئے کہا کہ کسان ہونے کے باعث وہ کاشتکاروں کے مسائل کو بہتر انداز میں سمجھتے ہیں۔مریم نواز نے کہا کہ حکومت کی ترجیح زراعت کو منافع بخش بنانا، جدید مشینری تک کسانوں کی رسائی بہتر کرنا اور زرعی پیداوار میں اضافے کے لیے ضروری سہولتیں فراہم کرنا ہے۔