وائٹ ہاؤس کی ایران کو سخت وارننگ سفارتکاری کے ساتھ دیگر آپشنز بھی موجود

پاکستان نیوز پوائنٹ
وائٹ ہاؤس نے ایران کو واضح پیغام دیتے ہوئے کہا ہے کہ امریکی صدر کے پاس صرف سفارتکاری ہی نہیں بلکہ اس سے آگے بھی کئی آپشنز موجود ہیں۔ یہ بیان ایسے وقت میں سامنے آیا ہے جب امریکا اور ایران کے درمیان اہم مذاکرات آج عمان کے دارالحکومت مسقط میں ہونے جا رہے ہیں۔ وائٹ ہاؤس کی پریس سیکرٹری کیرولین لیوٹ نے پریس بریفنگ کے دوران کہا کہ صدر ٹرمپ ایران کے معاملے پر اپنے مؤقف میں بالکل واضح ہیں اور وہ یہ جانچنا چاہتے ہیں کہ آیا کوئی قابلِ عمل معاہدہ ممکن ہے یا نہیں۔ انہوں نے ایرانی قیادت کو خبردار کرتے ہوئے کہا کہ امریکی صدر دنیا کی سب سے طاقتور فوج کے کمانڈر اِن چیف ہیں اور اپنے آئینی اختیارات استعمال کرنے کی مکمل صلاحیت رکھتے ہیں۔ دوسری جانب ایرانی وزارتِ خارجہ کے ترجمان نے اعلان کیا ہے کہ ایران مسقط میں ہونے والے جوہری مذاکرات میں مکمل اختیار کے ساتھ شریک ہوگا اور اس کا مقصد ایک منصفانہ، باہمی طور پر قابلِ قبول اور باوقار مفاہمت تک پہنچنا ہے۔