وزیراعظم شہباز شریف اور فیلڈ مارشل عاصم منیر کی ڈیووس میں عالمی اقتصادی فورم کے سالانہ اجلاس میں شرکت

پاکستان نیوز پوائنٹ
وزیراعظم محمد شہباز شریف اور چیف آف آرمی اسٹاف و چیف آف ڈیفینس فورسز فیلڈ مارشل سید عاصم منیر نے سوئٹزرلینڈ کے شہر ڈیووس میں منعقدہ عالمی اقتصادی فورم کے سالانہ اجلاس میں شرکت کی۔ فورم کے دوران وزیراعظم اور فیلڈ مارشل عالمی رہنماؤں کی توجہ کا مرکز بنے رہے اور مختلف ممالک کے قائدین سے غیر رسمی اور خوشگوار ملاقاتیں کیں۔ ذرائع کے مطابق وزیراعظم اور فیلڈ مارشل کی آذربائیجان کے صدر الہام علیئف، امریکہ کے سیکریٹری آف اسٹیٹ مارکو روبیو اور سعودی عرب کے وزیرِ خارجہ شہزادہ فیصل بن فرحان آل سعود سے اہم ملاقاتیں ہوئیں، جن میں دوطرفہ تعلقات، علاقائی صورتحال اور عالمی امور پر تبادلہ خیال کیا گیا۔ فورم میں شریک عالمی رہنماؤں سے غیر رسمی ملاقاتوں کے دوران مسکراہٹوں کے تبادلے اور گرمجوشی دیکھنے میں آئی، جسے پاکستان کی فعال سفارت کاری کی علامت قرار دیا جا رہا ہے۔ وزیراعظم شہباز شریف اور فیلڈ مارشل سید عاصم منیر نے امریکی صدر ڈونلڈ ٹرمپ کے عالمی اقتصادی فورم میں خصوصی خطاب میں بھی شرکت کی، جس میں عالمی معیشت، سلامتی اور مستقبل کے چیلنجز پر گفتگو کی گئی۔