کویتی وزیر دفاع کی قیادت میں اعلیٰ سطح کے دفاعی وفد کی فیلڈ مارشل سید عاصم منیر سے ملاقات

پاکستان نیوز پوائنٹ
کویت کے وزیر دفاع شیخ عبداللہ علی عبداللہ السالم الصباح کی قیادت میں اعلیٰ سطح کے دفاعی وفد نے جی ایچ کیو میں چیف آف آرمی اسٹاف فیلڈ مارشل سید عاصم منیر سے ملاقات کی۔پاک فوج کے شعبہ تعلقات عامہ (آئی ایس پی آر) کے مطابق کویتی مسلح افواج کے چیف آف جنرل اسٹاف لیفٹیننٹ جنرل خالد درج سعد الشریعان بھی وفد میں شامل تھے۔ملاقات میں باہمی دلچسپی کے امور، علاقائی سلامتی اور پاکستان، کویت دوطرفہ دفاعی تعاون پر تفصیلی تبادلہ خیال کیا گیا، دونوں جانب سے ادارہ جاتی روابط اور دفاعی تعاون کو مزید وسعت دینے کے عزم کا اعادہ کیا گیا۔کویتی وفد نے پاکستان کی مسلح افواج کی پیشہ ورانہ صلاحیتوں اور آپریشنل مہارت کو سراہتے ہوئے علاقائی امن و استحکام کے لیے پاک فوج کی خدمات کو خراج تحسین پیش کیا۔ملاقات میں پاکستان اور کویت کے تاریخی برادرانہ تعلقات کو مزید مضبوط دفاعی شراکت داری میں تبدیل کرنے کے عزم کا اظہار کیا گیا۔ دونوں جانب نے اس بات پر اتفاق کیا کہ پاک کویت دفاعی تعاون علاقائی سلامتی اور استحکام کے فروغ میں اہم کردار ادا کرے گا۔