کینیڈا کی وزیر خارجہ انیتا آنند کی وفاقی وزیر داخلہ محسن نقوی سے ملاقات

پاکستان نیوز پوائنٹ
کینیڈا کی وزیر خارجہ انیتا آنند نے وفاقی وزیر داخلہ محسن نقوی سے ملاقات کی، جس میں پاک- کینیڈا تعلقات، تجارت، سکیورٹی اور باہمی روابط کے فروغ سمیت مختلف شعبوں میں تعاون بڑھانے پر تبادلہ خیال کیا گیا۔ملاقات کے دوران غیرقانونی امیگریشن، انسانی اسمگلنگ اور سائبر کرائمز کی روک تھام کے لیے باہمی تعاون، جبکہ قانون نافذ کرنے والے اداروں کے افسران کی تربیت اور ایکسچینج پروگرام پر بھی گفتگو ہوئی۔دونوں وزراء نے دوطرفہ تعاون کے فروغ کے لیے مفاہمتی یادداشت (ایم او یو) پر جلد دستخط کرنے پر اتفاق کیا۔ ملاقات میں خطے کی تازہ ترین صورتحال پر بھی تبادلہ خیال کیا گیا۔وفاقی وزیر داخلہ محسن نقوی نے کہا کہ پاکستان کینیڈا کے ساتھ تعلقات کو تمام شعبوں میں مزید فروغ دینا چاہتا ہے اور کینیڈا میں مقیم پاکستانی برادری دونوں ممالک کی ترقی میں اہم کردار ادا کر رہی ہے۔وزیر مملکت برائے داخلہ طلال چوہدری نے کہا کہ مشترکہ مفادات کے شعبوں میں تعاون بڑھانے کے معاہدے سے دوطرفہ تعلقات مزید مستحکم ہوں گے۔
کینیڈا کی وزیر خارجہ انیتا آنند نے کہا کہ ان کا ملک پاکستان کے ساتھ تعلقات کو اہمیت دیتا ہے اور دوطرفہ تعاون کو مزید وسعت دینے کا خواہاں ہے۔ انہوں نے اس مقصد کے لیے باہمی تعاون کا ایک مؤثر فریم ورک تشکیل دینے کی ضرورت پر بھی زور دیا۔ملاقات میں وزیر مملکت طلال چوہدری، پاکستان میں کینیڈا کے ہائی کمشنر، ڈی جی ایف آئی اے، وزارت داخلہ کے ایڈیشنل سیکرٹریز اور دیگر اعلیٰ حکام بھی موجود تھے۔