ٹرمپ آئندہ ہفتوں میں خامنہ ای کو قتل کرنے کی کوشش کریں گے سابق امریکی سفیر کا دعویٰ

پاکستان نیوز پوائنٹ
اسرائیل کے لیے سابق امریکی سفیر ڈان شپیرو نے دعویٰ کیا ہے کہ امریکی صدر ڈونلڈ ٹرمپ آئندہ چند ہفتوں میں ایران کے سپریم لیڈر آیت اللہ خامنہ ای کو قتل کرنے کی کوشش کر سکتے ہیں۔غیر ملکی میڈیا کے مطابق ایک انٹرویو میں ڈان شپیرو کا کہنا تھا کہ مشرق وسطیٰ میں امریکی فوجی سرگرمیوں میں اضافے کے بعد ایران کے خلاف کارروائیوں کا امکان بڑھ گیا ہے۔ ان کا کہنا تھا کہ آیت اللہ خامنہ ای کی عمر 86 برس ہو چکی ہے اور وہ صحت کے مسائل کا شکار ہیں، اس لیے ایران کو نئی قیادت کی ضرورت ہے۔سابق امریکی سفیر نے سماجی رابطے کی ویب سائٹ ایکس پر جاری بیان میں کہا کہ جلد امریکا کا ایک بڑا بحری بیڑا مشرق وسطیٰ میں تعینات ہوگا جو ایران پر ممکنہ حملے کو آسان بنائے گا اور کسی بھی جوابی کارروائی کی صورت میں دفاعی تیاریوں میں مدد فراہم کرے گا۔واضح رہے کہ یہ بیان ایسے وقت میں سامنے آیا ہے جب ایرانی سپریم لیڈر آیت اللہ خامنہ ای نے الزام عائد کیا ہے کہ ایران میں تشدد، مظاہروں اور قتل کے واقعات میں امریکی صدر ملوث ہیں