پاکستان نیوز پوائنٹ
خیبرپختونخوا کے علاقے دانا سر میں مسافر بس کھائی میں گرنے سے 40 افراد جاں بحق اور متعدد زخمی ہوگئے۔ ضلعی انتظامیہ کے مطابق مسافر بس کوئٹہ سے پشاور جا رہی تھی کہ ژوب اور ڈیرہ اسماعیل خان کے درمیانی علاقے دانا سر میں افسوسناک حادثہ پیش آیا۔ حادثے میں متعدد افراد زخمی ہوئے ہیں، 8 زخمیوں کو ہسپتال منتقل کر دیا گیا ہے۔ وزیراعلیٰ بلوچستان کے معاون شاہد رند نے کہا کہ ضلعی انتظامیہ، ریسکیو ادارے اور متعلقہ محکمے نے زخمیوں کو فوری طبی امداد فراہم کی۔ابتدائی معلومات کے مطابق حادثے کا شکار بس میں اپنے مسافروں کے علاوہ ایک خراب ہونے والی دوسری بس کے مسافر بھی سوار تھے۔ڈپٹی کمشنر شیرانی ولی کاکڑ کا کہنا ہے کہ دشوار گزار علاقے کے باوجود ریسکیو ٹیمیں امدادی کارروائیوں میں مصروف رہیں۔ ضلعی انتظامیہ صورتحال کی مسلسل نگرانی کر رہی ہے۔محکمہ صحت حکام کے مطابق بلوچستان کے قریبی ہسپتالوں میں ایمرجنسی نافذ کر دی گئی ہے۔ صدر آصف علی زرداری ،وزیراعظم شہباز شریف اور وزیراعلیٰ بلوچستان نے دانہ سر مسافر بس حادثے پر گہرے دکھ اور افسوس کا اظہار کیاہے۔ صدر مملکت نے زخمیوں کو ہر ممکن اور بہترین طبی سہولیات فراہم کرنے کی ہدایت کرتے ہوئے کہااندوہناک سانحے پر پوری قوم متاثرہ خاندانوں کے غم میں برابر کی شریک ہے۔وزیراعلیٰ بلوچستان نے متعلقہ اداروں کو فوری امدادی کارروائیاں تیز کرنے کی ہدایت کی۔سرفراز بگٹی نے کہا،،حادثے میں قیمتی انسانی جانوں کے ضیاع پر حکومت بلوچستان سوگوار ہے۔جائے حادثہ پر ریسکیو اور امدادی کارروائیاں جاری ہیں۔
