افغانستان میں موجود دہشتگرد تنظیمیں نہ صرف پاکستان بلکہ پوری دنیا کیلئے خطرہ بن چکی ہیں

پاکستان نیوز پوائنٹ
اقوام متحدہ کی جنرل اسمبلی میں افغانستان کی صورتحال پر مباحثے کے دوران پاکستان کے مستقل مندوب عاصم افتخار نے عالمی برادری کو خبردار کرتے ہوئے کہا کہ افغانستان میں موجود دہشتگرد تنظیمیں نہ صرف پاکستان بلکہ پوری دنیا کیلئے خطرہ بن چکی ہیں انہوں نے واضح کیا کہ پاکستان کو افغان سرزمین سے کالعدم تحریک طالبان پاکستان کے دہشتگردوں کی دراندازی کا سامنا ہے جو ملکی سلامتی کو سنگین چیلنجز سے دوچار کر رہی ہے عاصم افتخار نے کہا کہ افغانستان میں چھوڑے گئے جدید ہتھیار پاکستان پر حملوں میں استعمال ہو رہے ہیں انہوں نے اس بات پر زور دیا کہ افغان سرزمین کسی بھی ملک کے خلاف دہشتگردی کے لیے استعمال نہیں ہونی چاہیے لیکن بدقسمتی سے یہ زمین مسلسل پاکستان کے خلاف استعمال ہو رہی ہے انہوں نے عالمی برادری پر زور دیا کہ یقینی بنایا جائے کہ افغانستان دوبارہ دہشتگردوں کی محفوظ پناہ گاہ نہ بنے کیونکہ القاعدہ الخوارج ٹی ٹی پی اور بلوچ شدت پسند آج بھی افغانستان سے سرگرم عمل ہیں اس حوالے سے ایک اہم پیش رفت گزشتہ روز ہونے والے پاک افغان ایڈیشنل سیکرٹری سطح مذاکرات میں بھی سامنے آئی جہاں دونوں ممالک نے اس بات پر اتفاق کیا کہ دہشتگردی خطے کے امن و ترقی کے لیے خطرہ ہے ترجمان دفتر خارجہ کے مطابق پاکستان نے مذاکرات کے دوران افغانستان میں موجود دہشتگرد گروہوں کے خلاف فوری کارروائی پر زور دیا اور نشاندہی کی کہ ان دہشتگردوں کی کارروائیاں نہ صرف پاکستان کو نقصان پہنچا رہی ہیں بلکہ پورے خطے کی ترقی میں رکاوٹ بن رہی ہیں دونوں ممالک نے باہمی تجارت اور ٹرانزٹ تعاون کو مزید مضبوط بنانے پر بھی بات چیت کی اور اس بات پر اتفاق کیا کہ علاقائی استحکام کے لیے مشترکہ اقدامات ناگزیر ہیں