وزیرِ اعظم کی ملکی برآمدات میں اضافے کیلئے قرضوں کی فراہمی میں سہولیات فراہم کرنے کی ہدایت

پاکستان نیوز پوائنٹ
وزیراعظم شہباز شریف کی زیر صدارت سمیڈا سے متعلق جائزہ اجلاس میں چھوٹے اور درمیانے درجے کی صنعتوں کی استعداد کار بڑھانے پر تفصیلی غورکیا گیا۔وزیراعظم نے ہدایت کی کہ کسانوں کو اپنی زرعی اجناس اور پھلوں کی ویلیوایڈیشن اور پراسیسنگ کے حوالے سے آگاہی، فنی معاونت اور قرضوں کی سہولت فراہم کی جائے جبکہ کمرشل بینکوں کو ایس ایم ایز کے لیے خصوصی قرضہ اسکیمیں متعارف کرانے کی بھی حوصلہ افزائی کی جائے۔ وزیر اعظم نے کہا کہ کاروبار شروع کرنے کے خواہشمند افراد کو فیزیبیلٹی رپورٹ کی تیاری اور دیگر ضروری مراحل میں بھی مکمل معاونت فراہم کی جائےجبکہ ایس ایم ایز کی ترقی کی راہ میں حائل رکاوٹوں کو ہنگامی بنیادوں پر دور کیا جائے۔وزیراعظم نے سمیڈا کو نوجوانوں، بالخصوص خواتین انٹرپرینیورز کو نئے کاروبار قائم کرنے میں بھرپورتعاون فراہم کرنے کی بھی ہدایت دی۔ اجلاس کو بریفنگ میں بتایا گیا کہ پاکستانی ایس ایم ایز کی عالمی منڈی تک رسائی اور برآمدات میں اضافے کے لیے رواں سال 700 ایس ایم ایز کی 16 بین الاقوامی تجارتی نمائشوں میں شرکت یقینی بنائی گئی جبکہ 35 شہروں میں مالیاتی ضوابط اور کاروباری امور سے متعلق تربیتی پروگرام بھی منعقد کیے گئے ہیں۔ اجلاس میں نائب وزیراعظم و وزیر خارجہ اسحاق ڈار، وفاقی وزیر ڈاکٹر مصدق ملک، معاون خصوصی ہارون اختر، متعلقہ اعلیٰ حکام، چاروں صوبوں کے چیف سیکریٹریز اور شعبے کے ماہرین نے ویڈیو لنک کے ذریعے شرکت کی۔