ایلون مسک کی انٹرنیٹ سروس اسٹار لنک اچانک بند ہزاروں صارفین متاثر

پاکستان نیوز پوائنٹ
امریکی ارب پتی ایلون مسک کی انٹرنیٹ سروس ’اسٹار لنک‘ اچانک بند ہو گئی، جس سے یوکرینی فوج سمیت عالمی سطح پر ہزاروں صارفین متاثر ہو گئے۔ اسٹار لنک کمپنی نے پیر کے روز اپنی ویب سائٹ پر تصدیق کی کہ اس کی سیٹلائٹ انٹرنیٹ سروس میں بڑی خرابی آئی ہے، بیان میں کہا گیا کہ کمپنی اس وقت سروس کی بندش کا سامنا کر رہی ہے اور تیکنیکی ٹیم اس معاملے کی تحقیقات کر رہی ہے۔
ویب سائٹ ڈاؤن ڈیٹیکٹر کے مطابق صبح 04:35 بجے تک امریکا میں 43 ہزار سے زائد صارفین اس خرابی سے متاثر ہو چکے تھے۔ جب کہ یوکرین میں فرنٹ لائن فورس نے بھی متاثر ہونے کی شکایت کی۔ اسٹار لنک کے مطابق اس کے 6 ملین سے زیادہ عالمی صارفین ہیں، کمپنی کو ایلون مسک کی کمپنی اسپیس ایکس چلاتی ہے، جو زمین کے قریب مدار میں گردش کرنے والے سیٹلائٹس کے ذریعے تیز رفتار انٹرنیٹ فراہم کرتی ہے۔ یہ سروس خاص طور پر دور دراز اور تنازعات سے متاثرہ علاقوں میں استعمال ہوتی ہے۔ واضح رہے کہ یوکرین نے اپنے بمبار ڈرونز کے بیڑے کو چلانے کے لیے روس کے حملے کے دوران اسٹار لنک کی سروسز پر انحصار کیا ہے، اس لیے اس سروس میں خرابی آتی ہے تو یوکرینی فوج بھی متاثر ہو جاتی ہے۔ دو ماہ قبل بھی اسٹار لنک سروسز کی بندش کی وجہ سے یوکرینی فوج متاثر ہوئی تھی۔ 24 جولائی کو اسٹار لنک دو گھنٹے سے زیادہ وقت کے لیے بند ہو گیا تھا، نتیجے کے طور پر یوکرین کو جنگی کارروائیاں براہ راست نشریات کے بغیر انجام دینا پڑیں۔