شمالی وزیرستان میں سیکیورٹی فورسز کا آپریشن 7 خوارج ہلاک

پاکستان نیوز پوائنٹ
خیبرپختونخوا کے ضلع شمالی وزیرستان میں سیکیورٹی فورسز نے انٹیلی جنس معلومات کی بنیاد پر کارروائی کرتے ہوئے 7 خوارج کو ہلاک کردیا، جبکہ بھاری مقدار میں اسلحہ اور گولہ بارود بھی برآمد کیا گیا۔سیکیورٹی ذرائع کے مطابق خیبرپختونخوا میں عزم استحکام ویژن کے تحت دہشت گردوں کے خلاف کارروائیاں جاری ہیں۔ اسی سلسلے میں شمالی وزیرستان میں انٹیلی جنس بیسڈ آپریشن کیا گیا. جس کے دوران سیکیورٹی فورسز نے مؤثر کارروائی کرتے ہوئے 7 خوارج کو ہلاک کردیا۔سیکیورٹی ذرائع کا کہنا ہے کہ کارروائی کے دوران ہلاک ہونے والے دہشت گردوں کے قبضے سے بھاری مقدار میں اسلحہ اور گولہ بارود برآمد کیا گیا، جبکہ عزم استحکام ویژن کے تحت جاری کارروائیوں میں خوارج کے متعدد ٹھکانے بھی تباہ کیے گئے ہیں۔وزیراعظم شہباز شریف نے خیبرپختونخوا میں فتنہ الخوارج کے خلاف کامیاب کارروائیوں پر سیکیورٹی فورسز کی کارکردگی کو سراہتے ہوئے انہیں خراج تحسین پیش کیا۔وزیراعظم نے کہا کہ ملک سے دہشت گردی کے مکمل خاتمے تک دہشت گردوں کے خلاف کارروائیاں جاری رہیں گی۔ انہوں نے اس عزم کا اظہار کیا کہ حکومت پاکستان سے دہشت گردی کے مکمل خاتمے کے لیے پرعزم ہے۔وفاقی وزیر داخلہ محسن نقوی نے بھی شمالی وزیرستان میں کارروائی کے دوران 7 خوارج کو ہلاک کرنے پر سیکیورٹی فورسز کے عزم اور پیشہ ورانہ صلاحیتوں کو سراہا۔محسن نقوی کا کہنا تھا کہ قوم دہشت گردی کے خاتمے کے لیے اپنی بہادر سیکیورٹی فورسز کے ساتھ کھڑی ہے اور خوارج کو کسی بھی جگہ چھپنے کی جگہ نہیں ملے گی۔وفاقی وزیر داخلہ کے مطابق عزم استحکام ویژن کے تحت دہشت گردوں کے خلاف بلاامتیاز کارروائیاں جاری ہیں اور یہ سلسلہ آئندہ بھی جاری رہے گا۔