عالمی ادارہ صحت کا موٹاپے اور ذیابیطس کی ادویات سے متعلق بڑا فیصلہ

پاکستان نیوز پوائنٹ
ورلڈ ہیلتھ آرگنائزیشن (ڈبلیو ایچ او) نے کینسر اور سسٹک فائبروسس کے علاج کے ساتھ ساتھ موٹاپے اور ذیابیطس کے لیے ادویات کا ایک نیا مجموعہ اپنی ضروری ادویات کی فہرست میں شامل کیا ہے۔ اقوام متحدہ کی ایجنسی نے جمعہ کو ایک بیان میں کہا کہ گلوکاگن نما پیپٹائڈ-1 (GLP-1) ادویات کے سستے جنرک ورژن بھی ترقی پذیر ممالک کے لوگوں کے لیے دستیاب کرائے جائیں۔ یہ فہرست، بالغوں کے لیے 523 اور بچوں کے لیے 374 ادویات پر مشتمل ہے، ان دوائیوں کا ایک کیٹلاگ ہے جو WHO کے خیال میں تمام کام کرنے والے صحت کے نظاموں میں دستیاب ہونا چاہیے۔ ڈبلیو ایچ او کےمطابق نئی فہرست صحت کے عالمی نظام میں بڑی پیشرفت ہے۔ اوزیمپک اور ماؤنجاروجیسی ادویات ٹائپ ٹو ذیابیطس کے مریضوں کیلئےشامل کی گئی ہیں۔ ادویات دل ،گردوں کی بیماری یا موٹاپےکیساتھ ذیابیطس مریضوں کو دی جائیں گی۔ عالمی ادارہ صحت کا کہنا ہے کہ دنیا بھر میں 800 ملین سے زائد افراد ذیابیطس کے مرض میں مبتلا ہیں جب کہ ایک ارب سے زائد افراد موٹاپے کا شکار ہیں۔ عالمی ادارہ صحت کا کہنا ہے کہ 2021 میں موٹاپے سے جڑی بیماریوں کے باعث 37لاکھ سے زائد افراد ہلاک ہوئے، موٹاپےسے اموات ملیریا، ٹی بی اور ایچ آئی وی سے زیادہ ہیں۔