عوام کی حمایت اور سیکیورٹی فورسز کی مسلسل کوششوں سے دہشتگردی کا مکمل خاتمہ کیا جائیگا محسن نقوی

پاکستان نیوز پوائنٹ
وفاقی وزیرِ داخلہ محسن نقوی نے بلوچستان اور خیبر پختونخوا میں ’’خوارج‘‘ کے خلاف خفیہ معلومات پر مبنی کامیاب آپریشنز کرنے پر سیکیورٹی فورسز کو خراجِ تحسین پیش کیا، آپریشنز کے دوران مجموعی طور پر 11 دہشتگرد ہلاک کر دیئے گئے۔ وزارت داخلہ کے مطابق وفاقی وزیر نے اپنے بیان میں دہشت گردوں کے منصوبوں کو ناکام بنانے پر سیکیورٹی فورسز کی تعریف کی اور آپریشنز کے دوران ان کی پیشہ ورانہ صلاحیتوں کا اعتراف بھی کیا۔محسن نقوی نے کہا کہ سیکیورٹی فورسز نے جنوبی وزیرستان میں خفیہ معلومات پر مبنی آپریشن کے دوران5 خوارج کو ہلاک کیا۔ بلوچستان کے علاقے ماشکیل میں ایک اور کارروائی کے دوران مزید 6 خوارج مارے گئے۔قوم کو سیکیورٹی فورسز کے ان بہادر جوانوں پر فخر ہے جو دہشت گردی کے خلاف جنگ میں اپنے فرائض سرانجام دے رہے ہیں۔ انہوں نے دہشت گرد عناصر کے خلاف کارروائی میں ان کی کوششوں اور عزم کو سراہا۔محسن نقوی نے کہا کہ دہشت گردی کے خلاف جاری مہم میں پوری قوم سیکیورٹی فورسز کے شانہ بشانہ کھڑی ہے۔ انہوں نے اس بات پر زور دیا کہ امن و استحکام برقرار رکھنے کی کوششوں کو مضبوط بنانے میں عوامی حمایت ایک اہم عنصر ہے۔وزیرِ داخلہ نے اس عزم کا اعادہ کیا کہ عوام کی حمایت اور سیکیورٹی فورسز کی مسلسل کوششوں سے دہشت گردی کا مکمل خاتمہ کیا جائے گا۔ ملک میں دہشت گرد عناصر کو شکست دینے اور تمام علاقوں میں سیکیورٹی کو یقینی بنانے کے لیے پرعزم ہیں۔