فلسطینیوں پر اسرائیلی مظالم دنیا کے ضمیر پر دھبہ ہیں برطانوی وزیر خارجہ

پاکستان نیوز پوائنٹ
برطانیہ کے وزیر خارجہ ایڈ ملی بینڈ نے غزہ اور مغربی کنارے میں جاری مظالم پر اسرائیلی حکومت کو سخت تنقید کا نشانہ بناتے ہوئے فلسطینیوں پر اسرائیلی مظالم کو دنیا کے ضمیر پر دھبہ قرار دیا ہے۔ انہوں نے اسرائیلی حکومت کے خلاف مزید سخت اقدامات کا اعلان کرتے ہوئے کہا ہے کہ وزیراعظم اینڈی برنہم کی قیادت میں برطانیہ نے فلسطین کے معاملے پر اپنی خارجہ پالیسی کو تبدیل کیا ہے۔برطانوی وزیرِ خارجہ ایڈ ملی بینڈ نے لیورپول میں حکمران جماعت لیبر پارٹی کی سالانہ کانفرنس سے خطاب کرتے ہوئے اسرائیل کے فلسطینیوں پر مظالم پر کھل کر بات کی۔انہوں نے کہا کہ برطانیہ کی نئی حکومت نے غزہ اور مغربی کنارے کے معاملے پر اپنی پالیسی بڑی حد تک تبدیل کی ہے۔ایڈ ملی بینڈ نے اپنے خطاب میں دنیا بھر میں فلسطینی عوام کی حالتِ زار پر دکھی اور سراپا احتجاج افراد اور تنظیموں کو مخاطب کرتے ہوئے کہا ’ہم آپ کی آواز سن رہے ہیں، آپ حق پر تھے۔‘برطانوی وزیرِ خارجہ کی تقریر کو کانفرنس میں موجود شرکاء نے خوب سراہا اور دیر تک تالیاں بجتی رہیں۔انہوں نے اسرائیل کے فلسطینی علاقوں پر یہودی بستیوں کے قیام کو غیر قانونی قبضہ اور آبادکاروں کو دہشت گردی سے تعبیر کرتے ہوئے کہا کہ ’“ہم مغربی کنارے میں آباد کار دہشت گردوں کی جانب سے کی جانے والی نسل کشی، غزہ میں جنگی جرائم کے شواہد اور فلسطین پر اسرائیل کے غیر قانونی قبضے کے خلاف کھل کر آواز اٹھاتے رہے ہیں. مگر اب ہم اپنے الفاظ کو عملی اقدامات میں بدلیں گے۔‘انہوں نے مقبوضہ مغربی کنارے میں قائم اسرائیلی بستیوں پر معاشی پابندیاں برقرار اور مزید اقدامات کا اعلان کرتے ہوئے کہا کہ غیر قانونی بستیوں سے اشیا کی درآمد پر پابندی کے بعد اُن غیر قانونی بستیوں کے لیے برطانوی سرمایہ کاری اور دیگر سروسز کی سپلائی لائنز کو بھی مکمل طور پر ختم کیا جائے گا۔ایڈ ملی بینڈ نے اپنی تقریر میں ’دو ریاستی حل‘ کے دفاع کے عزم کا بھی اظہار کیا۔ ان کا کہنا تھا کہ لیبر پارٹی اور برطانوی حکومت آزاد فلسطینی ریاست کے قیام کو نقصان پہنچانے والی کوششوں کو کامیاب نہیں ہونے دے گی