فیفا ورلڈ کپ میں شاندار فتح مصری کوچ کا جیت فلسطینیوں کے نام کرنے کا اعلان

پاکستان نیوز پوائنٹ
مصری فٹبال ٹیم کے کوچ حسام حسن نے عالمی کپ کے ناک آؤٹ مرحلے میں آسٹریلیا کے خلاف تاریخی کامیابی فلسطینی عوام کے نام کر دی۔ فیفا ورلڈ کپ 2026 کے ایک انتہائی سنسنی خیز اور تاریخی میچ میں آسٹریلیا کو شکست دینے کے بعد مصر کے مایہ ناز فٹ بال کوچ حسام حسن نے ٹیم کی یہ شاندار فتح مظلوم فلسطینی عوام کے نام کر دی ہے۔ میچ کے بعد انہوں نے اسٹیڈیم میں ہجوم کے فلک شگاف نعروں کے درمیان فلسطین کا جھنڈا لہرا کر یکجہتی کا اظہار کیا۔ مصر اور آسٹریلیا کے درمیان کھیلے گئے اس اعصاب شکن ناک آؤٹ میچ کا مقررہ وقت 1-1 کی برابری پر ختم ہوا، جس کے بعد پنالٹی شوٹ آؤٹ پر مصر نے آسٹریلیا کو 2-4 سے شکست دے کر اگلے مرحلے میں جگہ بنائی۔ تاریخی کامیابی کے فوراً بعد کوچ حسام حسن نے مصر اور فلسطین کے پرچم ایک ساتھ اٹھائے اور پوری مصری ٹیم نے میدان میں اللہ کے حضور سجدہ شکر ادا کیا۔ س کانفرنس کے دوران صحافیوں سے گفتگو کرتے ہوئے جذباتی انداز میں حسام حسن نے کہا ’اچھے کام اچھے لوگوں کی وجہ سے ہی ممکن ہوتے ہیں، چاہے وہ مصر میں ہوں، عرب دنیا میں ہوں یا پوری دنیا میں۔ انہوں نے کہا کہ میں ایک بات واضح طور پر کہنا چاہتا ہوں کہ میرا دل اور میری روح فلسطینی عوام کے ساتھ ہے۔ وہ ہماری اس جیت پر بہت خوش ہیں اور میں ان کا شکریہ ادا کرتا ہوں۔ اللہ ان کو کامیابی اور فتح عطا کرے اور تمام شہدا پر اپنی رحمت نازل فرمائے۔ دلچسپ بات یہ ہے کہ مصر کی یہ تاریخی فتح ایک ایسے وقت میں سامنے آئی ہے جب غزہ پر اسرائیلی جارحیت کو 1000 دن مکمل ہو چکے ہیں، جس میں اب تک 73 ہزار سے زائد فلسطینی شہید اور 90 فیصد سے زائد علاقہ تباہ ہو چکا ہے۔