قطر اپنی سلامتی کو نشانہ بنانے والی کارروائی کو برداشت نہیں کرے گا اسرائیلی حملے کی شدید مذمت

پاکستان نیوز پوائنٹ
قطر نے اپنے دارالحکومت پر اسرائیل کے ہوائی حملوں کی شدید مذمت کی ہے اور کہا ہے کہ قطر اپنی سلامتی اور خودمختاری کو نشانہ بنانے والی کارروائی کو برداشت نہیں کرے گا۔ قطر کی وزارت خارجہ کے ترجمان نے آج شام دارالحکومت دوحہ میں حماس کے اجلاس پر اسرائیلی طیاروں کی بمباری کو قطر کی سالمیت پر سنگین حملہ قرار دیا اور اس حملے کی سخت الفاظ میں مذمت کی ہے۔ قطر نے دوحہ میں حماس پر اسرائیلی حملے کو ‘بزدلانہ’ قرار دیا ہے۔ قطر کی وزارت خارجہ کے ترجمان ماجد الانصاری نے ایک بیان میں کہا ہے کہ ملک اس حملے کی “سخت ترین الفاظ میں مذمت کرتا ہے”، جو ان کے بقول حماس کے سیاسی بیورو کے متعدد ارکان کی رہائش گاہوں پر کیا گیا تھا۔
بیان میں کہا گیا ہے کہ ’’یہ مجرمانہ حملہ تمام بین الاقوامی قوانین اور اصولوں کی کھلی خلاف ورزی ہے اور قطریوں اور قطر کے باشندوں کی سلامتی اور تحفظ کے لیے سنگین خطرہ ہے‘‘۔ “اس حملے کی شدید مذمت کرتے ہوئے، ریاست قطر اس بات کا اعادہ کرتی ہے کہ وہ اسرائیل کے اس لاپرواہ رویے اور علاقائی سلامتی کے ساتھ اس کی مسلسل چھیڑ چھاڑ کے ساتھ ساتھ اس کی سلامتی اور خودمختاری کو نشانہ بنانے والی کسی بھی کارروائی کو برداشت نہیں کرے گی۔ اس کی اعلیٰ سطح پر تحقیقات جاری ہیں، اور مزید تفصیلات دستیاب ہوتے ہی اعلان کی جائیں گی۔”