لاہور اسلام آباد موٹر وے پر سفر کرنیوالوں کیلئے بری خبر ٹول ٹیکس میں پھر اضافہ

پاکستان نیوز پوائنٹ
نیشنل ہائی ویز اتھارٹی نے لاہور – اسلام آباد موٹروے (M-2) کے ٹول ٹیکس میں اضافے کا اعلان کر دیا، نئے نرخ آج 26 اگست سے 25 اگست 2026 تک نافذ العمل رہیں گے۔سرکاری اعلامیے کے مطابق یہ اضافہ ہر سال ہونے والے 10 فیصد اضافے کا حصہ ہے جو 23 اپریل 2014 کو فرنٹیئر ورکس آرگنائزیشن (FWO) کی ذیلی کمپنی موٹروے آپریشنز اینڈ ری ہیبیلیٹیشن انجینئرنگ پرائیویٹ لمیٹڈ کے ساتھ طے پانے والے کنسیشن ایگریمنٹ کے تحت کیا جاتا ہے، یہ معاہدہ Build-Operate-Transfer (BOT) بنیاد پر ہے اور اس میں دوسرے آپریشنل سال سے ہر سال شرح میں اضافہ لازمی قرار دیا گیا ہے۔کار، جیپ اور ٹیکسی (کلاس 1) کے لیے ٹول ٹیکس 1330 روپے مقرر کی گیا ہے، کار، جیپ اور ٹیکسی (کلاس 1) کے لیے فی کلومیٹر 3.72 روپے بنتے ہیں، جبکہ ویگن (کلاس 2) کے لیے ٹول ٹیکس 2240 روپے (6.24 روپے فی کلومیٹر) وصول کیا جائے گا، بسوں سے 3130 روپے (8.73 روپے فی کلومیٹر) لیے جائیں گے۔یہ نیا اضافہ موٹروے استعمال کرنے والے عام مسافروں اور ٹرانسپورٹ کے کاروبار سے جڑے افراد پر براہ راست اثر ڈالے گا۔ماہرین کے مطابق کار اور جیپ کے کرایوں میں محدود فرق آئے گا لیکن بسوں اور فریٹ وہیکلز کے بڑھتے ہوئے اخراجات کرایوں اور مال برداری کی لاگت کو خاصا متاثر کر سکتے ہیں۔