میجر عزیز بھٹی شہید کی وطن کے لیے عظیم قربانی ہمارا قومی اثاثہ ہے وزیر اعظم شہباز شریف

پاکستان نیوز پوائنٹ
وزیر اعظم شہباز شریف نے کہا ہے کہ میجر عزیز بھٹی شہید، نشانِ حیدر کے یوم شہادت پر پوری قوم انکو دِلی خراجِ عقیدت پیش کرتی ہے۔ میجر عزیز بھٹی شہید کی وطن کے لیے عظیم قربانی ہمارا قومی اثاثہ ہے۔میجر عزیز بھٹی شہید کی 61 ویں برسی پر اپنے پیغام میں وزیراعظم محمد شہباز شریف نے کہا کہ دفاعِ وطن کی تاریخ میں میجر عزیز بھٹی شہید کی گراں قدر قربانی بہادری اور جرأت مندی کی روشن داستان ہے۔ 1965 کی جنگ میں دلیری سے اپنی قیمتی جان مادرِ وطن پر نچھاور کی۔ جنگ کے دوران لاہور برکی سیکٹر پر میجر عزیز بھٹی دشمن کے سامنے سیسہ پلائی دیوار کی طرح ڈٹے رہے اور 12 ستمبر 1965ء کو جامِ شہادت نوش کیا۔پوری قوم تمام شہداء بالخصوص میجر عزیز بھٹی شہید کے جذبہ حب الوطنی اور جانفشانی کو سلام پیش کرتی ہے۔ شہداء کا نام انکی قربانی کی طرح وطن سے بے لوث محبت کا استعارہ ہے۔ میجر عزیز بھٹی شہید کی وطن کے لیے عظیم قربانی ہمارا قومی اثاثہ ہے۔ وطن کی مٹی گواہ ہے کہ اسکے بہادر سپوت اسکے تقدس اور دفاع کے لیےجان ہتھیلی پر رکھتے ہیں۔ ملکی تحفظ و دفاع کا غیر متزلزل عزمِ پختہ ہماری رگوں میں شامل ہے۔پیغام کے آخر میں وزیر اعظم نے کہا کہ میجر راجہ عزیز بھٹی شہید کی بے مثل قربانی اور شجاعت قومی فخر کی علامت ہے۔ اور نوجوانوں کے لیے مشعلِ راہ ہے۔اللہ تعالیٰ شہید کے درجات بلند فرمائے ۔آمین