وزیراعظم شہباز شریف کی ایرانی صدر مسعود پزشکیان سے ٹیلیفونک گفتگو بندرعباس میں ہونے والے دھماکے کی شدید مذمت کی

پاکستان نیوز پوائنٹ
پاکستان کے وزیراعظم شہباز شریف نے ایرانی صدر مسعود پزشکیان سے ٹیلیفون پر بات چیت کرتے ہوئے بندرعباس میں ہونے والے دھماکے کی شدید مذمت کی اور اس سانحے میں جاں بحق ہونے والے افراد کے لواحقین سے دلی تعزیت کا اظہار کیا۔ وزیراعظم نے اپنے پیغام میں کہا کہ پاکستان ہر قسم کی دہشت گردی کی شدید مذمت کرتا ہے اور خطے میں امن کے قیام کے لیے ایران کے تعمیری اقدامات کی حمایت کرتا ہے۔ وزیراعظم شہباز شریف نے اس بات کو اجاگر کیا کہ پاکستان خود دہشت گردی کا سب سے بڑا شکار رہا ہے اور اس کے خلاف ہونے والی قربانیاں پوری دنیا کے سامنے ہیں۔ انہوں نے ایرانی صدر کو بھارت کی اشتعال انگیز کارروائیوں سے بھی آگاہ کیا اور کہا کہ پاکستان خطے میں امن کا خواہاں ہے اور کسی بھی قسم کی دہشت گردی یا اشتعال انگیزی کی حمایت نہیں کرتا۔ ایرانی صدر مسعود پزشکیان نے وزیراعظم کی تعزیت کا شکریہ ادا کیا اور خطے میں امن کے لیے پاکستان کی کوششوں کو سراہا۔ صدر مسعود نے وزیراعظم شہباز شریف کو تہران کا دورہ کرنے کی دعوت دی جسے وزیراعظم نے خوشی سے قبول کیا اور ایرانی صدر کو پاکستان کے دورے کی دعوت بھی دی۔ وزیراعظم شہباز شریف نے اس عزم کا اعادہ کیا کہ پاکستان خطے میں امن، استحکام اور ترقی کے لیے ہر ممکن کردار ادا کرتا رہے گا اور ان کی حکومت اس مقصد کے لیے مسلسل کام کرے گی۔