وزیراعلیٰ پنجاب مریم نواز شریف کے محفوظ پنجاب وژن کا عالمی سطح پر اعتراف

پاکستان نیوز پوائنٹ
وزیراعلیٰ پنجاب مریم نواز شریف کے جدید اور ٹیکنالوجی پر مبنی منصوبوں کو بین الاقوامی سطح پر بھرپور پذیرائی حاصل ہورہی ہے۔ انہی اقدامات کے تسلسل میں پنجاب سیف سٹیز اتھارٹی ہیڈکوارٹرز لاہور میں نومبر میں ASEAN کیپیسٹی بلڈنگ کانفرنس منعقد کی جارہی ہے۔ تفصیلات کے مطابق یہ پانچ روزہ عالمی کانفرنس 17 تا 21 نومبر منعقد ہوگی جس میں ASEAN کے 11 رکن ممالک کے اعلیٰ سطحی نمائندگان شرکت کریں گے۔ کانفرنس کے دوران سیف سٹیز اتھارٹی کے اے آئی پر مبنی اقدامات، جدید ٹیکنالوجی ماڈلز اور سٹیزن سینٹرک سروسز کو بطور کامیاب ماڈل پیش کیا جائے گا۔ کانفرنس میں اے آئی بیسڈ پولیسنگ، سمارٹ سرویلنس، ٹریفک مینجمنٹ اور شہری سہولیات پر خصوصی سیشنز منعقد کیے جائیں گے، جبکہ لائیو ڈیمونسٹریشنز کے ذریعے شرکاء کو براہِ راست جدید نظاموں کا عملی مشاہدہ کرایا جائے گا۔ ترجمان سیف سٹی کے مطابق سیف سٹی اتھارٹی کے جدید اقدامات اور اے آئی بیسڈ سروسز پاکستان کے مثبت تشخص کو عالمی سطح پر اجاگر کریں گی اور یہ کانفرنس پاکستان اور ASEAN ممالک کے درمیان ٹیکنالوجی تعاون کو مزید مستحکم بنانے میں اہم کردار ادا کرے گی۔ اس کانفرنس کو خطے میں ٹیکنالوجی اور سکیورٹی تعاون کے لیے سنگِ میل قرار دیا۔