آئی ایم ایف اور پاکستان کے مذاکرات میں اہم پیشرفت جلد معاہدے کی امید

پاکستان نیوز پوائنٹ
عالمی مالیاتی فنڈ (آئی ایم ایف) نے کہا ہے کہ پاکستان کے ساتھ ہونے والی بات چیت میں حوصلہ افزا پیش رفت ہوئی ہے اور آئندہ چند دنوں میں مذاکرات کو حتمی شکل دی جا سکتی ہے۔ آئی ایم ایف کی جانب سے 25 فروری سے 11 مارچ تک جاری رہنے والے مذاکرات کے بعد اعلامیہ جاری کیا گیا۔اعلامیے کے مطابق آئی ایم ایف نے اصلاحات اور ماحولیاتی اقدامات کے شعبوں میں پاکستان کی کارکردگی کو سراہا ہے۔ تاہم 7 ارب ڈالر کے ایکسٹینڈڈ فنڈ فیسیلٹی (EFF) پروگرام کے تحت ابھی تک اسٹاف لیول معاہدہ طے نہیں ہو سکا۔آئی ایم ایف کے مطابق پاکستان نے اصلاحاتی ایجنڈے پر قابلِ ذکر پیش رفت کی ہے اور ماحولیاتی تبدیلی سے نمٹنے کے لیے بھی اقدامات کیے گئے ہیں۔ مذاکرات کے دوران مالیاتی خسارہ کم کرنے اور سرکاری مالیات کو مضبوط بنانے پر بھی تفصیلی بات چیت ہوئی۔اعلامیے میں کہا گیا کہ توانائی کے شعبے میں اصلاحات اور کارکردگی بہتر بنانے کے امور بھی زیرِ بحث آئے، جبکہ سماجی تحفظ، صحت اور تعلیم کے اخراجات بڑھانے کے حوالے سے پاکستانی معاشی ٹیم سے گفتگو کی گئی۔ آئی ایم ایف نے مہنگائی پر قابو پانے کے لیے سخت مانیٹری پالیسی برقرار رکھنے پر بھی زور دیا۔مذاکرات کے دوران مشرق وسطیٰ میں جاری جنگ کے ممکنہ معاشی اثرات اور اس کے پاکستان پر پڑنے والے اثرات پر بھی تبادلہ خیال کیا گیا۔ آئی ایم ایف کے مطابق آئندہ چند دنوں میں بات چیت کو حتمی شکل دے دی جائے گی۔