پاکستان اور روس کا آئی ٹی مصنوعی ذہانت اور جدید کمپیوٹنگ میں تعاون بڑھانے پر اتفاق

پاکستان نیوز پوائنٹ
پاکستان اور روس کے درمیان انفارمیشن ٹیکنالوجی، مصنوعی ذہانت اور جدید کمپیوٹنگ کے شعبوں میں تعاون بڑھانے پر اتفاق کیا گیا۔اسلام آباد میں پاکستان سافٹ ویئر ایکسپورٹ بورڈ اور روس کی یونیورسٹی آف ورلڈ سویلائزیشنز کے اشتراک سے پاک روس آئی ٹی تعاون پر اعلیٰ سطح کا ویبینار منعقد ہوا، جس کی صدارت وفاقی وزیر منصوبہ بندی احسن اقبال نے کی۔ ویبینار سے خطاب کرتے ہوئے احسن اقبال نے کہا کہ پاکستانی نوجوانوں کی صلاحیتیں اور روس کی سائنسی و انجینئرنگ مہارت ایک دوسرے کے لیے معاون ثابت ہو سکتی ہیں، اڑان پاکستان میں ای پاکستان معاشی تبدیلی کا اہم ستون ہے، جبکہ 2035 تک ایک ٹریلین ڈالر کی معیشت کا ہدف مقرر کیا گیا ہے۔ اجلاس میں مصنوعی ذہانت، سیمی کنڈکٹرز، سائبر سکیورٹی، کوانٹم کمپیوٹنگ اور جدید سافٹ ویئر ٹیکنالوجی میں مشترکہ منصوبوں اور سرمایہ کاری کے امکانات پر تبادلہ خیال کیا گیا۔ شرکاء نے مشترکہ ٹیکنالوجی مصنوعات، پائلٹ منصوبوں اور پاکستانی و روسی کمپنیوں کے درمیان کاروباری روابط بڑھانے کی تجاویز پیش کیں۔ وفاقی وزیر نے کہا کہ پاک روس ٹیکنالوجی تعاون سے مشترکہ مصنوعات، سرمایہ کاری اور روزگار کے نئے مواقع پیدا ہوں گے، جبکہ دونوں ممالک کی آئی ٹی صنعتوں کو عالمی منڈیوں تک رسائی میں مدد ملے گی۔