پاکستان نیوز پوائنٹ
کراچی میں بغیر لائسنس موٹر سائیکل چلانے والوں کے لیے سخت کارروائی کا اعلان کیا گیا ہے۔ ڈی آئی جی ٹریفک پیر محمد شاہ نے شہریوں کو خبردار کیا ہے کہ اب بغیر ڈرائیونگ لائسنس موٹر سائیکل یا گاڑی چلانے پر 20ہزار روپے تک جرمانہ عائد کیا جائے گا۔ ان کا کہنا ہے کہ شہری اپنے ڈرائیونگ لائسنس فوری طور پر بنوائیں یا تجدید کروائیں، کیونکہ آئندہ کسی کو رعایت نہیں دی جائے گی۔ ڈی آئی جی ٹریفک کے مطابق ٹریفک قوانین کی پابندی کو یقینی بنانے کے لیے شہر بھر میں مہم تیز کر دی گئی ہے۔ انہوں نے بتایا کہ کراچی میں موٹر سائیکل سواروں کی بڑی تعداد لائسنس کے بغیر سڑکوں پر نکلتی ہے، جس کے باعث حادثات میں اضافہ ہو رہا ہے۔ اب ایسے تمام افراد کے خلاف بھرپور کارروائی کی جائے گی۔ پیر محمد شاہ نے واضح کیا کہ تمام چھوٹی اور بڑی گاڑیوں کے لیے اسپیڈ لمٹ 60 کلومیٹر فی گھنٹہ مقرر کی گئی ہے، اور اس سے تجاوز کرنے والے ڈرائیورز کو اوور اسپیڈنگ کا چالان کیا جائے گا۔ انہوں نے کہا کہ ٹریفک پولیس شہر میں نظم و ضبط قائم کرنے کے لیے جدید نظام متعارف کرا چکی ہے، جس کے تحت اب فیس لیس ای چالان سسٹم کے ذریعے خلاف ورزیاں خودکار طریقے سے ریکارڈ کی جا رہی ہیں۔ اس نظام کے پہلے دن ہی صرف چھ گھنٹوں میں 2 ہزار 662 چالان جاری کیے گئے، جن کی مجموعی مالیت تقریباً ایک کروڑ پچیس لاکھ روپے رہی۔ رپورٹ کے مطابق سب سے زیادہ چالان سیٹ بیلٹ نہ باندھنے پر کیے گئے جن کی تعداد 1,535 رہی، جبکہ ہیلمٹ کے بغیر موٹر سائیکل چلانے پر 507 چالان ہوئے۔ اس کے علاوہ اوور اسپیڈنگ پر 419، ریڈ سگنل توڑنے پر 166 اور لین لائن کی خلاف ورزی پر 3 چالان جاری کیے گئے۔ پیر محمد شاہ کا کہنا ہے کہ ای چالان سسٹم میں تکنیکی بہتری کا عمل جاری ہے تاکہ خلاف ورزی کرنے والے شہریوں کو فوری نوٹس بھیجا جا سکے۔ انہوں نے کہا کہ شہریوں کو چاہیے کہ وہ اپنے ای چالان باقاعدگی سے چیک کریں اور جرمانے کی رقم وقت پر جمع کروائیں، بصورت دیگر ان کے لائسنس معطل یا گاڑیاں ضبط کی جا سکتی ہیں۔ انہوں نے مزید کہا کہ فیس لیس چالان سسٹم کے ذریعے پولیس اہلکاروں اور شہریوں کے درمیان براہ راست رابطہ کم ہو جائے گا جس سے شفافیت میں اضافہ ہوگا اور رشوت ستانی کے امکانات بھی ختم ہوں گے۔ ٹریفک پولیس نے شہریوں سے اپیل کی ہے کہ وہ ٹریفک قوانین کی مکمل پاسداری کریں، ہیلمٹ اور سیٹ بیلٹ کا استعمال یقینی بنائیں اور اپنی اور دوسروں کی جانوں کو محفوظ رکھیں۔
پاکستان نیوز پوائنٹ وزیراعظم شہباز شریف کی زیر صدارت ملک میں سرمایہ کاری کے فروغ…
پاکستان نیوز پوائنٹ وفاقی وزیرداخلہ محسن نقوی کی جانب سے مقامی طور پر تیار کردہ…
پاکستان نیوز پوائنٹ پاکستان آرمی راکٹ فورس کمانڈ کی جانب سے مقامی طور پر تیار…
پاکستان نیوز پوائنٹ وفاقی وزیر صحت مصطفیٰ کمال کا کہنا ہے کہ ہم نے تیسری…
پاکستان نیوز پوائنٹ پاک افغان سرحد پر افغان طالبان اور فتنہ الخوارج کی بلا اشتعال…
پاکستان نیوز پوائنٹ عالمی و مقامی گولڈ مارکیٹس میں دو دن تیزی کے بعد سونے…