آئی ایم ایف کا بِٹ کوائن مائننگ اور اے آئی کو بجلی فراہم کرنے پر اظہارِ تشویش حکومت سے وضاحت طلب

پاکستان نیوز پوائنٹ
عالمی مالیاتی فنڈ (آئی ایم ایف) نے حکومت پاکستان کی جانب سے بِٹ کوائن مائننگ اور آرٹیفیشل انٹیلجنس کے شعبوں کو بجلی فراہم کرنے کے حالیہ فیصلے پر شدید تحفظات کا اظہار کیا ہے ذرائع کے مطابق آئی ایم ایف نے اس فیصلے پر نہ صرف وضاحت طلب کی ہے بلکہ اسے قرض پروگرام کی شرائط کے برخلاف قرار دیا ہے رپورٹ کے مطابق آئی ایم ایف نے اعتراض اٹھایا ہے کہ حکومت نے نہ صرف اس اقدام سے قبل فنڈ کو اعتماد میں نہیں لیا بلکہ بجلی کے ٹیرف سے متعلق بھی کوئی مشاورت نہیں کی ذرائع کا کہنا ہے کہ آئی ایم ایف نے واضح کیا ہے کہ قرض پروگرام کے دوران کوئی بھی پالیسی فیصلہ مشاورت کے بغیر نہیں کیا جا سکتا ذرائع کے مطابق آئی ایم ایف نے بجلی کی فراہمی کے حوالے سے خاص طور پر اس بات پر سوالات اٹھائے ہیں کہ پاکستان میں کرپٹو کرنسی تاحال قانونی حیثیت نہیں رکھتی ایسے میں اس شعبے کے لیے بجلی مختص کرنا کئی قانونی و مالیاتی پیچیدگیاں پیدا کر سکتا ہے آئی ایم ایف اور پاکستانی حکام کے درمیان اس معاملے پر ورچوئل بات چیت بھی متوقع ہے جس میں بِٹ کوائن مائننگ کے لیے بجلی کی فراہمی اور اس پر لاگو ٹیرف کے حوالے سے تفصیلات طلب کی جائیں گی دوسری جانب وزیر خزانہ محمد اورنگزیب اور وزارت خزانہ کے ترجمان نے اس معاملے پر تاحال کسی بھی مؤقف دینے سے گریز کیا ہے ذرائع کے مطابق پاکستان کی معاشی ٹیم کو آئندہ بجٹ کے سلسلے میں جاری مذاکرات کے دوران آئی ایم ایف کے کڑے سوالات کا سامنا کرنا پڑ رہا ہے تجزیہ کاروں کے مطابق اس اقدام پر آئی ایم ایف کی جانب سے مزید سخت مؤقف اور مذاکرات میں دباؤ بڑھنے کا امکان ہے جو آنے والے مالیاتی فیصلوں پر بھی اثرانداز ہو سکتا ہے