ایرانی سپریم لیڈر کا حکومت کے حق میں مظاہروں پر قوم کو خراجِ تحسین

پاکستان نیوز پوائنٹ
ایرانی سپریم لیڈر نے ایرانی قوم کو خراجِ تحسین پیش کرتے ہوئے کہا ہے کہ عظیم ایرانی قوم نے ایک تاریخی دن رقم کیا ہے۔ایرانی سپریم لیڈر آیت اللہ علی خامنہ ای نے حکومت کے حق میں ہونے والے ملک گیر مظاہروں پر ایرانی قوم کو خراجِ تحسین پیش کرتے ہوئے کہا ہے کہ عظیم ایرانی قوم نے ایک تاریخی دن رقم کیا ہے۔آیت اللہ خامنہ ای کے مطابق اظہار یکجہتی کی عظیم ریلیوں نے غیر ملکی دشمنوں کی سازشوں کو خاک میں ملا دیا۔انہوں نے کہا کہ دشمنوں کی سازشوں پر اندرونی کرائے کے ایجنٹوں کے ذریعے عمل کرایا جانا تھا، مگر ایرانی قوم نے اپنے اتحاد سے ان منصوبوں کو ناکام بنا دیا۔سپریم لیڈر نے کہا کہ عظیم ایرانی قوم نے دشمنوں کے مقابلے میں اپنے عزم، اپنی شناخت اور قومی غیرت کا بھرپور اظہار کیا۔انھوں نے کہا کہ یہ مظاہرے امریکی سیاستدانوں کو خبردار کرنے کے لیے تھے کہ وہ دھونس، دھاندلی اور زور زبردستی کے خواب دیکھنا چھوڑ دیں۔آیت اللہ خامنہ ای نے امریکا کو مخاطب کرتے ہوئے کہا کہ وہ اپنے فریبی اقدامات بند کرے اور اپنے آلہ کاروں پر بھروسہ کرنا چھوڑ دے۔انہوں نے مزید کہا کہ ایرانی قوم مضبوط، طاقتور اور باخبر ہے، دشمن کو پہچانتی ہے اور دشمن کے خلاف ہمیشہ میدان میں موجود رہتی ہے