سکیورٹی فورسز نے بلوچستان میں دو مختلف کارروائیاں کرتے ہوئے بھارتی پراکسی یافتہ 41 دہشتگردوں کو ہلاک کردیا

پاکستان نیوز پوائنٹ
سکیورٹی فورسز نے بلوچستان میں دو مختلف کارروائیاں کرتے ہوئے بھارتی پراکسی یافتہ 41 دہشتگردوں کو ہلاک کردیا۔پاک فوج کے شعبہ تعلقات عامہ آئی ایس پی آر کے مطابق 29 جنوری کو بلوچستان میں دو الگ الگ کارروائیاں کی گئیں، کارروائیوں کے دوران بھارتی پراکسی تنظیموں کے 41 دہشتگرد ہلاک ہوئے۔آئی ایس پی آر کے مطابق ہرنائی ضلع کے نواحی علاقے میں خفیہ اطلاعات پر کارروائی کی گئی، کارروائی کے دوران سکیورٹی فورسز نے دہشتگردوں کے ٹھکانے کو مؤثر انداز میں نشانہ بنایا، شدید فائرنگ کے تبادلے کے بعد بھارتی سرپرستی میں سرگرم 30 خوارج جہنم واصل کیے گئے۔شعبہ تعلقات عامہ کے مطابق ہلاک دہشتگردوں سے بڑی مقدار میں اسلحہ اور دھماکا خیز مواد برآمد کیا گیا، ہلاک دہشتگردوں کا تعلق فتنہ الخوارج اور فتنہ الہندوستان سے تھا، برآمد شدہ دھماکا خیز مواد کو موقع پر ہی تلف کر دیا گیا۔آئی ایس پی آر کا کہنا ہے کہ ضلع پنجگور میں بھی خفیہ اطلاع پر کارروائی کے دوران دہشتگردوں کا ٹھکانا تباہ کیا گیا، کارروائی میں فتنہ الہندوستان سے تعلق رکھنے والے 11 بھارتی حمایت یافتہ دہشتگرد ہلاک ہوئے۔پاک فوج کے شعبہ تعلقات عامہ کا بتانا ہے کہ ہلاک دہشتگردوں سے اسلحہ، گولہ بارود اور بینک ڈکیتی کی لوٹی گئی رقم بھی برآمد کی گئی، برآمد رقم 15 دسمبر 2025 کو پنجگور میں ہونے والی بینک ڈکیتی سے تعلق رکھتی تھی۔شعبہ تعلقات عامہ کے مطابق ہلاک دہشتگرد ماضی میں متعدد دہشت گردانہ کارروائیوں میں ملوث رہے، علاقے میں مزید بھارتی حمایت یافتہ دہشتگردوں کے خاتمے کے لیے کلیئرنس آپریشن جاری ہیں، ’عزمِ استحکام‘ کے وژن کے مطابق انسدادِ دہشت گردی مہم پوری رفتار سے جاری رہے گی۔آئی ایس پی آر کا کہنا ہے سکیورٹی فورسز، قانون نافذ کرنے والے ادارے غیر ملکی سرپرستی میں ہونے والی دہشتگردی کے مکمل خاتمے کے لیے پُرعزم ہیں۔