شدید گرمی کی لہر سے یورپ متاثر متعدد ممالک میں ہائی الرٹ سینکڑوں ہلاکتیں

پاکستان نیوز پوائنٹ
یورپ شدید اور غیر معمولی گرمی کی لہر کی لپیٹ میں ہے، جہاں کئی ممالک میں درجہ حرارت 40 ڈگری سینٹی گریڈ سے تجاوز کر گیا ہے، جبکہ حکام نے صحت عامہ کے ہنگامی انتباہات جاری کر دیے ہیں۔ رپورٹس کے مطابق اسپین میں صرف چار روز کے دوران گرمی سے متعلق واقعات میں 212 افراد جان کی بازی ہار گئے، جبکہ فرانس، جرمنی، اٹلی، برطانیہ اور نیدرلینڈز میں بھی ہائی الرٹ جاری کر دیا گیا ہے۔ فرانس میں تین سالہ بچے سمیت 52 افراد ہلاک ہوئے، جبکہ پیرس میں گزشتہ 24 گھنٹوں کے دوران دل کے دورے کے 25 اور دیگر ہلاکتوں کے 55 واقعات رپورٹ ہوئے۔ دوسری جانب سوئٹزرلینڈ میں گرمی نے گزشتہ 80 سال کا ریکارڈ توڑ دیا۔ شدید گرمی کے باعث متعدد اسپتالوں میں کولنگ سسٹم متاثر ہونے سے غیر ہنگامی آپریشنز اور اسکین عارضی طور پر ملتوی کر دیے گئے، جبکہ کئی تاریخی و سیاحتی مقامات بھی بند کر دیے گئے ہیں۔ ماہرین کے مطابق یہ یورپ کی تاریخ کی بدترین گرمی کی لہروں میں سے ایک ہے اور موسمیاتی تبدیلی کے اثرات براعظم میں تیزی سے نمایاں ہو رہے ہیں۔