لبنان پر حملے بند نہ ہوئے تو امریکا کے ساتھ مذاکرات روک دیں گے ایرانی سپیکر

پاکستان نیوز پوائنٹ
ایرانی پارلیمنٹ کے سپیکر محمد باقر قالیباف نے خبردار کیا ہے کہ اگر لبنان پر حملے بند نہ ہوئے تو امریکا کے ساتھ مذاکرات روک دیں گے۔ قالیباف نے لبنان کے اسپیکر نبیہ بری سے ٹیلیفونک رابطے کے دوران کہا کہ ایران خطے میں کسی بھی جارحیت کے خلاف لبنان کے ساتھ مضبوطی سے کھڑا ہے، انہوں نے زور دیا کہ موجودہ کشیدہ صورتحال میں خطے کے ممالک کو یکجہتی کا مظاہرہ کرنا چاہیے۔ بعد ازاں سوشل میڈیا پر اپنے بیان میں ایرانی اسپیکر محمد باقر قالیباف نے لکھا کہ “مزاحمت پائندہ باد، وطن کا دفاع پائندہ باد”۔ انہوں نے ایران اور لبنان کے عوام کے درمیان برادرانہ تعلقات کو سراہتے ہوئے کہا کہ “ایرانی اور لبنانی عوام کا بھائی چارہ پائندہ باد”۔ یہ بیانات ایسے وقت میں سامنے آئے ہیں جب مشرقِ وسطیٰ میں کشیدگی اور سیاسی دباؤ میں اضافہ دیکھا جا رہا ہے، اور مختلف فریقین کی جانب سے سفارتی رابطے تیز ہو گئے ہیں۔