نیٹو اجلاس میں ٹرمپ اور زیلنسکی کی اہم ملاقات یوکرین جنگ پر بڑا سفارتی رابطہ

پاکستان نیوز پوائنٹ
امریکی صدر ڈونلڈ ٹرمپ رواں ہفتے ترکی میں ہونے والے نیٹو سربراہی اجلاس کے موقع پر یوکرین کے صدر وولودی میر زیلنسکی سے اہم ملاقات کریں گے، جس میں یوکرین جنگ کے خاتمے کے لیے ممکنہ سفارتی حل پر تبادلہ خیال کیا جائے گا۔امریکی حکام کے مطابق صدر ٹرمپ منگل کو نیٹو اجلاس میں شرکت کے لیے ترکی پہنچیں گے، جہاں ان کی پہلی ملاقات میزبان ملک کے صدر رجب طیب اردوان سے ہوگی۔ اس کے علاوہ وہ شام کے صدر احمد الشرع سے بھی ملاقات کریں گے اور ایک پریس کانفرنس سے خطاب بھی کریں گے۔
ایک سینئر امریکی عہدیدار نے نام ظاہر نہ کرنے کی شرط پر بتایا کہ ٹرمپ اور زیلنسکی کے درمیان ملاقات بدھ کے روز ہوگی، جس میں جنگ کے خاتمے کے لیے عملی اقدامات اور ممکنہ پیش رفت پر گفتگو کی جائے گی۔امریکی عہدیدار کے مطابق گزشتہ چند ماہ کے دوران جنگی محاذ تقریباً جمود کا شکار ہے اور دونوں فریق کوئی نمایاں کامیابی حاصل نہیں کر سکے۔ ان کا کہنا تھا کہ صدر ٹرمپ اس جنگ کو جلد از جلد ختم کرنے کے لیے سنجیدہ اور پرعزم ہیں۔دوسری جانب صدر ٹرمپ نیٹو کے رکن ممالک پر بھی زور دیں گے کہ وہ اپنے دفاعی اخراجات میں مزید اضافہ کریں تاکہ اتحاد کی مجموعی دفاعی صلاحیت کو مضبوط بنایا جا سکے۔