وزیراعظم شہباز شریف عالمی مالیاتی فنڈ سے اہم ریلیف حاصل کرنے میں کامیاب

پاکستان نیوز پوائنٹ
وزیراعظم شہباز شریف عالمی مالیاتی فنڈ سے اہم ریلیف حاصل کرنے میں کامیاب ہوگئے۔ میڈیارپورٹ کے مطابق ذرائع کا کہنا ہے کہ وزیراعظم نے آئی ایم ایف کی منیجنگ ڈائریکٹر کو عوامی مسائل اور معاشی مشکلات سے آگاہ کرتے ہوئے مختلف شعبوں میں نرمی پر آمادہ کرلیا۔ذرائع کے مطابق آئی ایم ایف تنخواہ دار طبقے کیلئے ریلیف دینے پر آمادہ ہوگیا جبکہ وزیراعظم شہباز شریف تنخواہ دار طبقے کیلئے 60 ارب روپے کا ریلیف حاصل کرنے میں کامیاب رہے۔ذرائع کے مطابق آئی ایم ایف بے نظیر انکم سپورٹ پروگرام کے تحت دئیے جانے والے وظیفے میں اضافے پر بھی آمادہ ہوگیا ہے، جس سے مستحق خاندانوں کو مزید سہولت ملنے کا امکان ہے۔ذرائع نے بتایا کہ آئی ایم ایف نے سولر پینلز اور اسٹیشنری پر 18 فیصد سیلز ٹیکس عائد کرنے کا دبائو بھی واپس لے لیا ہے۔حکومت کی درخواست پر سولر پینلز پر 18 فیصد سیلز ٹیکس نافذ نہ کرنے کی تجویز زیر غور ہے جبکہ آئندہ بجٹ میں سولر پینلز پر سیلز ٹیکس 10 فیصد برقرار رہنے کا امکان ظاہر کیا جارہا ہے۔اسی طرح وزیراعظم شہباز شریف طلبہ اور والدین کیلئے بھی ریلیف حاصل کرنے میں کامیاب رہے، ذرائع کے مطابق اسٹیشنری پر مجوزہ 18 فیصد سیلز ٹیکس عائد نہ کرنے کا فیصلہ کیا گیا ہے۔ذرائع کا مزید کہنا ہے کہ اسٹاک مارکیٹ اور تمباکو مصنوعات پر ٹیکسز میں کسی بڑی تبدیلی کا امکان نہیں ہے۔